Elordanyń jıyrma jyldyǵy men Tuńǵysh Prezıdent kúnin merekeleý qarsańynda «Burynǵy jáne qazirgi Astananyń kıeli álemi» atty kórme ashyldy. Ekspozısııaǵa Astana mańyndaǵy Kúıgenjar shatqalyndaǵy saq dáýirindegi patsha qorǵanynan tabylǵan qundy jádigerler qoıyldy.
Jazdyń sońǵy kúnderi «Astana irgesinen osydan 2200 jyl buryn salynǵan kóne qorǵan tabyldy» dep súıinshileı habarlanǵan bolatyn. Astana qalasy Mádenıet jáne sport basqarmasy men L.N.Gýmılev atyndaǵy Eýrazııa ulttyq ýnıversıtetiniń K.A.Aqyshev atyndaǵy arheologııa ǵylymı-zertteý ınstıtýty birlesip qolǵa alǵan zertteý jumystary kezinde qorǵannyń joǵarǵy qabatyndaǵy bastapqy jeti zırat ashylyp, zerttelgen edi. Tasty saýyt úıindilerimen qaptalǵan qorǵan bıiktigi – 3,5 metr bolsa, dıametri 50 metrge jeteqabyl. Endi sol saq dáýirindegi patshalyq qorǵandarynan tabylǵan kóne jádigerlerdi kózben kórýge tamasha múmkindik týyp otyr.
K.A.Aqyshev atyndaǵy arheologııa ǵylymı-zertteý ınstıtýtynyń dırektory, arheologııalyq toptyń jetekshisi Maral Habdýlınanyń aıtýynsha, sáýleti men qurylysy qorymnyń 2200 jyl buryn salynǵanyn kórsetedi. Bir ókinishtisi, qorym typ-tıpyl tonalǵan, áıtse de adamzat tarıhyndaǵy asa mańyzdy kezeń sanalatyn erte temir dáýirindegi qorǵandar júıesine qatysty birshama mańyzdy aqparat belgili bolǵan. «Úıilgen topyraqtan jeti kire beris jerleý oryndary tabyldy. Jerleý rásimin zertteı kele, olardyń orta ǵasyrǵa tıesili ekeni belgili boldy. Túrki dáýirinde er adamdy jerleý rásimindegi bir erekshelik kúmis syrǵalar men belbeý qosa tabylyp otyr», deıdi ol.
Aıa О́MIRTAI,
«Egemen Qazaqstan»