Elbasy Nursultan Nazarbaevtyń «Uly dalanyń jeti qyry» maqalasynda: «Bizdiń mádenıetimizdiń negizgi sıýjetterinde, keıipkerleri men saryndarynda shekara bolmaıdy, sol sebepti ony júıeli zerttep, búkil Ortalyq Eýrazııa keńistigi men barsha álemde dáripteýge tıispiz» degen qaǵıdaty qazaqstandyq qoǵam úshin búginde úlken mánge ıe bolyp otyr. Osy oraıda, Qazaqstan Respýblıkasy Mádenıet jáne sport mınıstrliginiń qoldaýymen Temirbek Júrgenov atyndaǵy qazaq ulttyq óner akademııasynyń shyǵarmashylyq ujymy Eýropanyń Polsha, Chehııa jáne Vengrııa Respýblıkalaryna arnaıy saparǵa shyqty.
Polshanyń Frıderık Shopen atyndaǵy áýejaıda dombyra, qobyz jáne jetigen bir ýaqytta kúı oınady. Jolaýshylar erekshe áýendi estip, qoıylymdy kórý úshin kóptep jınaldy. Kórermender qazaqtyń qasıetti kúılerine erekshe tánti bolyp, qol shapalaqtap, qyzyqty qoıylym úshin rızashylyǵyn bildirdi. Osy sát Akademııa stýdentteriniń myń buralǵan ásem bıleri kórermender qoshemetine ıe boldy. Áýejaıdaǵy esten ketpes konsertti Júrgenov atyndaǵy ulttyq óner akademııasynyń mýzykanttary qoıdy. Bul olardyń Qazaqstannyń Tuńǵysh Prezıdenti kúnine oraı sheteldikterge jasaǵan tosynsyıy boldy.
Polıak kórermeni Hanna: «Maǵan mýzyka men bı óte qatty unady. Sizdiń eldiń mádenıeti men mýzykasy ádemi. Qazaqstanda bolǵan emespin. Biraq ondaı múmkindik týyp jatsa, qýana-qýana baramyn» dep jyly lebizin bildirdi.
Sondaı-aq, «Alataý» folklorlyq ansambli Varshavadaǵy Qazaqstan elshiliginiń uıymdastyrýymen bolǵan saltanatty jıynda halqymyzdyń ánderi men kúılerin oryndaýmen qatar, Eýropa elderiniń klassıkalyq shyǵarmalaryn oryndady. Merekelik-mádenı kósh Varshava saparynan keıin 3-shi jeltoqsan kúni Praga qalasynda jalǵasyp, artynsha 5 jeltoqsan kúni Býdapeshtte óz máresine jetedi.