Elimiz úshin eń qasterli kúnniń biri – Táýelsizdik merekesi. Jeltoqsan aıynyń bel ortasynda ótetin bul ataýly kún kóbine Jańa jyl meıramynyń tasasynda qalyp ketip jatatyny jasyryn emes. Osy keleńsizdikti boldyrmas úshin úshinshi megapolıs bıligi Jańa jyldyq shyrshany Táýelsizdik merekesinen keıin ornatatyn bolyp sheshim shyǵardy.
Osylaısha jyldyń basty shyrshasy 18 jeltoqsanda Beıbitshilik kóshesinde ashylǵan Jańa Arbatta qoıylady dep josparlanýda.
Esterińizge salar bolsaq, osydan ilgeri Shymkentte Jańa jyldyq bezendirýge bıýdjet qarjysynan 70 mln teńge bólingeni týraly aıtylǵan bolatyn. Bul týraly jýyrda Ortalyq kommýnıkasııalar qyzmetinde ótken brıfıngte Shymkent qalasynyń qala ákimi Ǵabıdolla Ábdirahymov málimdegen edi.
Qala meriniń aıtýynsha mıllıondy shahar úshin 70 mln teńge anaý aıtqandaı kóp qarjy emes.
«London men Parıjdi, Máskeýdi qarańyz. Qazir bári qalaı jasalynyp jatyr?! Kez kelgen adam ómirdi «vaý» dep súrgisi keledi», degen edi Ábdirahymov brıfıngte aǵynan jarylyp.
Máselen, byltyr Shymkentti Jańa jylǵa oraı sándeý jumystaryna jergilikti qazyna qarjysynan 49 mln teńge bólingen. Al, qala kelbetin árleýge jaýapty sala mamandary bıylǵy qaralǵan bıýdjettiń kóptigin qalanyń respýblıkalyq erekshe mártebe alǵandyǵymen baılanystyrady.
Nurshat TО́KEN,
«Egemen Qazaqstan»
ShYMKENT