El óziniń erlerin umytpaýǵa tıis. Asyldarymyzdy ardaqtaı bilsek, júzimiz jarqyn, arymyz taza ári bul is keıingi urpaq úshin ómirsheń ónege. Taıaýda Arshaly aýdanyndaǵy №3 Arshaly orta mektebine Alashtyń birtýar perzenti Jumabek Táshenovtyń esimi berildi.
Jumabek Ahmetuly osy aýdannyń Tanagúl aýylynda 1915 jyldyń 20 naýryzynda dúnıege kelgen. О́z zamanynda respýblıkanyń saıası-ekonomıkalyq, mádenı damýyna qısapsyz eńbek sińirgen qaıratker. El Jumabek Táshenovtyń Mańǵystaýdy Túrkimenstanǵa qosý, Tyń ólkesine biriktirilgen soltústik oblystardy Reseıge, Ońtústik Qazaqstannyń maqtaly aýdandaryn О́zbekstanǵa berýge qarsy shyqqan batyr. Qazaqstan jerinde ıadrolyq jarylystar jasaýǵa da tosqaýyl qoıýǵa tyrysqan.
El gazeti «Egemenniń» bastaý kózi «Sosıalıstik Qazaqstan» gazetinde «Kazahstanskaıa pravda» gazetiniń aýdarmasy etip shyǵarýdan qorǵap qalǵan. Mine, osyndaı kózi qaraqty, kókiregi oıaý azamattardyń esinen ketpes erlik ister jasaǵan Jumabek Táshenovtyń esimi bilim ordasyna berilýi óte oryndy. Bul eń aldymen jas urpaqtyń eli men jerin súıýge baýlıtyn ónege. Aqmola jurtshylyǵy júregi qazaq dep soqqan jampozdyń jaqsy esiminiń endigi arada mektep oqýshylaryna dem berip, jiger quıatyndyǵyna qýanyshty.
Baıqal BAIÁDIL,
«Egemen Qazaqstan»
Aqmola oblysy,
Arshaly aýdany.