Qazaqstan Respýblıkasynyń Táýelsizdik kúnine oraı Ashhabadta ótken resmı qabyldaýda Túrikmenstan Mınıstrler kabıneti Tóraǵasynyń orynbasary Mammethan Chaqyev sóz sóıledi. Ol Túrikmenstan Prezıdenti Gýrbangýly Berdimuhamedovtiń jáne el úkimetiniń atynan quttyqtaý lebizin bildirdi.
«Táýelsizdiktiń alǵashqy kúnderinen bastap Túrikmenstan men Qazaqstan arasyndaǵy qarym-qatynastar ózara qurmet pen teń haqyly áriptestik prınsıpterine súıene otyryp damýda, al etnıkalyq, tildik, rýhanı jáne mádenı jaqyndyqtar eki el halyqtarynyń arasyndaǵy baılanystardyń negizgi quraýshylary. Túrikmenstan men Qazaqstan arasyndaǵy ekijaqty árekettestik deńgeıiniń joǵary ekenin rızashylyqpen atap ótkim keledi. Joǵary deńgeıdegi delegasııalar saparlarymen turaqty túrde almasý osyǵan kýá bolyp otyr», - dedi túrikmen vıse-premeri.
Ekijaqty baılanystardaǵy orny erekshe sala retinde M. Chaqyev sońǵy kezderi mańyzy artyp kele jatqan transport pen kommýnıkasııany aıtty. Bul rette ol 2014 jyly ashylǵan Qazaqstan-Túrikmenstan temir joly arqyly tasymal kóleminiń kúnnen-kúnge artyp kele jatqanyn tilge tıek etti. «Sonymen qatar elderimizdiń arasyndaǵy saýda-ekonomıkalyq áriptestikti ulǵaıtý úshin keń aýqymdy potensıaldy múmkindikter bar. Osy sebepti eki tarap ekonomıkanyń túrli sektorlarynda, onyń ishinde otyn-energetıka jáne kólik-kommýnıkasııa salalarynda yntymaqtastyqty óristete túsýge ynta tanytýda», - dep sózin sabaqtady M. Chaqyev.
Qazaqstannyń Túrikmenstandaǵy Elshisi Jandos Asanov Qazaqstannyń qazirgi kezeńdegi damýy, «Rýhanı jańǵyrý», «5-20-25», «100 naqty qadam» jáne basqa da memlekettik baǵdarlamalardyń oryndalý barysy jaıly aıtty.
«Qazaqstan jáne Túrikmenstan halyqtarynyń kópǵasyrlyq dostyǵy elderimizdiń mártebeli prezıdentteri Nursultan Nazarbaev pen Gýrbangýly Berdimuhamedovtiń jeke dostyǵynyń arqasynda damyp keledi. 2017 jyly sáýirde Astanada Qazaqstan men Túrikmenstan arasyndaǵy strategııalyq áriptestik týraly shartqa qol qoıylýy ekijaqty yntymaqtastyqtyń potensıalynyń keńeıýine keń múmkindikter ashty», - Elshi atap ótti.
Qazaqstandyq dıplomat ekijaqty baılanystardyń órbý tarıhyndaǵy mańyzdy mejelerine toqtalǵan kezinde memlekettik shekaranyń halyqaralyq-huqyqtyq resimdelgenin, eki el arasyn jalǵaǵan temir jol magıstraliniń ashylǵanyn, mádenı-gýmanıtarlyq árekettestiktiń nyǵaıa túskenin jáne Ashhabad qalasynda bıylǵy jyldyń 29-30 qarashasynda Qazaqstan mádenıet kúnderiniń tabysty ótkenin eske aldy.