Qazan aıynyń basynda ulttyq kınostýdııa «Balýan Sholaq» tarıhı kórkem fılminiń túsirilimderin aıaqtaǵany týraly málimdegen bolatyn. Osy aıtýly oqıǵaǵa oraı, kórermenderimen áli qaýyshyp úlgermegen fılmniń BAQ ókilderine arnalǵan jabyq kórsetilimi ótti.
«Balýan Sholaq» – rejısser Nurgeldi Sadyǵulovtyń kórkem fılm salasyndaǵy sony qadamy, tyrnaqaldy týyndysy ekenin atap ótken jón.
Sońǵy eki aı shyǵarmashylyq top úshin aýqymdy túsirilimderdiń montajyna arnaldy. Montajdyń sońǵy nusqasy «Qazaqfılm» kınostýdııasynyń Saraptamalyq keńesine kórsetilip, osydan keıin ǵana dybystaý, grafıka jáne tústeý jumystary atqaryldy, – dedi rejısser.
Sondaı-aq rejısser Býrabaıda ótken túsirilimder týraly baıandaı kele: «Kókshetaýdaǵy túsirilimder óte sátti ótti dep oılaımyn, sebebi men úshin tabıǵat taptyrmas akter. Túsirilim kezinde jańbyr jaýyp, boran da boldy. Soǵan qaramastan, túsirilim toby bir adamdaı jumys istedi. Sonyń arqasynda aldymyzǵa qoıǵan maqsatymyzǵa qol jetkizdik» degen bolatyn.
Fılmniń túsirilimderi Almaty oblysy, Pavlodar qalasy jáne Býrabaıda ótken. Kópshilik sahnalarǵa 300-ge jýyq adam qatysqan.
– Eń bastysy men úshin Balýan Sholaqtyń beınesin úlken ekranǵa ákelý jáne sol dáýirdi kórsetý boldy. Akterlerdiń barlyǵy da baryn saldy. Degenmen, Balýan Sholaq rólindegi Erkebulan Daıyrov, Aqylbaıdy somdaǵan Medǵat О́mirálıev pen Dolgonosovty oınaǵan Aleksandr Bagrıansevti erekshe atap ótkim keledi, – dedi rejısser Nurgeldi Sadyǵulov.
Osy arada fılmge eki birdeı treıler jáne eki saýndtrek ázirlengenin aıta ketelik. Fılm aldaǵy kúnderi qalyń kórermenimen qaýyshady.
Aınash ESALI,
«Egemen Qazaqstan»
ALMATY