Qazaq memlekettik qyzdar pedagogıkalyq ýnıversıtetinde kórnekti memleket jáne qoǵam qaıratkeri Nurtas Ońdasynovtyń qurmetine eskertkish taqta ornatyldy.
Qyzdar ýnıversıtetiniń 75 jyldyǵy qarsańyndaǵy taǵylymdy is Almaty qalalyq ákimdigi men oqý ornynyń bastamasymen uıymdastyryldy. Jıynǵa belgili azamattar men ǵalymdar, N. Ońdasynovtyń týystary jáne bilim ordasynyń ujymy qatysty. Sharany ýnıversıtet rektory Gaýhar Aldambergenova ashyp, qazaqtyń birtýar azamatynyń qaıratkerlik isterine toqtaldy.
– Tarıhty tulǵalar jasaıdy. Qazaq tarıhynda bolmysy bıik, bitimi erek azamattar barshylyq. Eliniń bolashaǵy, óskeleń urpaqtyń erteńi úshin aıanbaı qyzmet atqarǵan sondaı atpal azamattyń biri de biregeıi – Nurtas Dándibaıuly Ońdasynov. Nurtas Dándibaıuly keńestik ıdeologııa ústemdik quryp, kommýnıstik partııa dáýirlep turǵan zamanda ulttyq kadrlardy daıarlaýǵa eleýli úles qosyp, ózindik mektebin qalyptastyrdy. Ońdasynovtyń tikeleı atsalysýymen búgingi Ulttyq Ǵylym akademııasynyń irgetasy qalandy. Nurtas Dándibaıulynyń uıytqy bolýymen Qazaq memlekettik qyzdar pedagogıkalyq ınstıtýty, Qazaq memlekettik konservatorııasy, Dene shynyqtyrý ýchılıshesi syndy otandyq joǵary mektepter ashyldy. Búginde atalǵan bilim ordalary – bilikti maman daıarlap qana qoımaı, qazaqstandyq bilim berý júıesinde ózindik ornyn qalyptastyryp úlgerdi, – deıdi G. Aldambergenova.
Oqý ornynyń basshysy ultymyzdyń ardaqty azamatyn ulyqtaý – óskeleń urpaq tárbıesinde alatyn orny ólsheýsiz úlken ekenin de atap ótti.
– Qazaqta «О́tkenin umytqan – óshkendiktiń belgisi, ótkenin eske alǵan – óskendiktiń belgisi» degen qanatty sóz bar. Qyzdar ýnıversıtetindegi búgingi shara – sonyń naqty aıǵaǵy. О́skeleń urpaq úshin taǵylym bolarlyq ıgilikti iske bastama tanytyp, qoldaý bildirgen jandarǵa ýnıversıtet ujymy atynan alǵys aıtamyz, – dedi Gaýhar Tóremuratqyzy.
Sonymen qatar memorıaldy taqtanyń ashylý rásiminde Almaty qalasy Mádenıet jáne arhıvter basqarmasynyń basshysy Hanzada Esenova, memleket jáne qoǵam qaıratkeri Shámshá Berkimbaeva men belgili ǵalym, akademık О́mirzaq Aıtbaıuly sóz sóılep, N. Ońdasynovtyń qazaq halqynyń ıgiligi úshin atqarǵan ilkimdi isteri týrasynda keńinen áńgimeledi.
Shara aıasynda sondaı-aq Nurtas Ońdasynov týraly «Bılikten bıik tulǵa» atty derekti fılmniń tusaýkeseri ótip, kıno týyndy alǵash ret kópshilik nazaryna usynyldy. Qazaqstan Respýblıkasy Prezıdenti teleradıokesheniniń muryndyq bolýymen jaryq kórgen fılmde qaıratkerdiń sanaly ǵumyrynyń jarqyn sátteri men shyǵarmashylyq eńbekteri jaıly tyń málimetter, zamandastary men zııaly qaýym ókilderiniń estelikteri baıandalǵan.
Aıta keteıik, Nurtas Ońdasynov Qazaq KSR Halyq Komıssarlar Keńesiniń tóraǵasy, Qazaq KSR Joǵarǵy Keńesi Tóralqasy tóraǵasynyń tóraǵasy, Gýrev (Atyraý) oblystyq atqarý komıtetiniń tóraǵasy, Gýrev oblystyq partııa komıtetiniń birinshisi hatshysy qyzmetterin atqarǵan. «Arabsha-qazaqsha», «Parsysha-qazaqsha» túsindirme sózdikteriniń avtory. Eki márte «Eńbek Qyzyl Tý» ordenimen marapattalǵan.
Jandar ASAN,
Qyzdar ýnıversıtetiniń Baspasóz ortalyǵynyń basshysy