Erteń «Almaty Arena» sport kesheninde erejesiz jekpe-jekten Titan FC halyqaralyq týrnır ótedi. Osyǵan oraı, búgin Ulttyq kitaphanada aıtýly jarysqa qatysýshylar salmaq ólsheý rásiminen ótip, odan keıin baspasóz máslıhaty uıymdastyryldy.
«Titan FC» – álemdegi eń iri promoýshenderdiń biri. Ár jyldary osy uıymda óner kórsetken 74 sportshy ýaqyt oza UFC-de kúsh synasý qurmetine ıe boldy. Bizdiń de kózdegenimiz sol. Sondyqtan da «Titan FC» klýbymen birlesip jumys isteý úshin eki jyl boıy eńbektendik. Aqyry ortaq týrnır ótkizý jaıynda kelisimge qol qoıdyq. Erteń barlyqtaryńyzdy Alataý baýraıynda ótetin alapat aıqasty tamashalaýǵa shaqyramyz. Jeke óz basym, keleshekte UFC-de qazaq jigitteriniń qarasy kóbeıetinine senimdimin, – deıdi «Álem faıters» klýbynyń basshysy, osy jarysty uıymdastyrýshylardyń biri Ardaq Nazarov.
Osy keshtiń basty jekpe-jegi qazaqtyń qaısar uly Beıbit Nazarov pen amerıkalyq Martın Braýnnyń arasynda ótedi. Olar jeńil salmaq dárejesi (70,2 kılo) boıynsha ýaqytsha álem chempıony ataǵy úshin talasady. Taǵy bir mańyzda básekede Qazybek Áshimov pen kolýmbııalyq Hýan Pýerta kúsh synasady. Olar asa jeńil salmaqtyń (57 kılo) chempıondyq belbeýin sarapqa salady.
- Men óz qarsylasymdy ábden zerttep aldym da, osy jaýapty kezdesýge jaqsylyp turyp daıarlandym. Erteń barlyǵyn ózderińiz de kóresizder. Chempıondyq belbeý bizdiń elde qalady, – deıdi Beıbit Nazarov.
Reıtıngtik básekelerde Aıbek Nurseıit, Nurjan Tutqaev, Rýslan Qamzaev, Salaýat Beısenhanov jáne Syrym Bektursyn syndy qandastarymyz Brazılııa, Qyrǵyzstan, Reseı, Ázirbaıjan jáne Qytaı sportshylarymen sheberlik baıqasady. Olardan bólek, osy keshte Germanııa, Gollandııa jáne Iаmaıkanyń órenderi óner kórsetedi.
Ǵalym SÚLEIMEN,
«Egemen Qazaqstan»