«Kóktý» qazaq mádenıeti qoǵamynyń bastamasy jáne Qazaqstannyń Túrkııadaǵy Elshiligi qoldaýymen «Alash týy astynda» atty derekti fılmniń Túrkııadaǵy tusaýkeseri Ankara qalasynda ótti.
Tusaýkeserge Qazaqstannyń Túrkııadaǵy ókiletti jáne tótenshe Elshisi Abzal Saparbekuly, Kitaphanalar jáne basylymdar bas dırektorynyń orynbasary Iаhııa О́zen, Prof. Dr. Hýlııa Kasapoglý Chengel, Prof. Dr. Ábdýaqap Qara, Dos. Dr. Djemıle Kynadjy, Túriksoıdaǵy Qazaqstan ókili Asqar Turǵanbaev, túrik zııalylary, qazaqstandyq stýdentter qatysty.
Alǵy sózinde Qazaqstan Elshisi Abzal Saparbekuly jeltoqsan aıynyń qazaq ulty úshin erekshe mańyzy bar ekenin aıta kele Alash qozǵalysy jóninde túsirilgen eń aýqymdy fılmdi daıyndap, Túrkııada kórsetken Kóktý qoǵamyna alǵysyn jetkizdi. "Ult azattyq kúres jolynda Mirjaqyp Dýlatov "Oıan, qazaq! degen bolsa, Elbasy Nursultan Nazarbaev«Rýhanı jańǵyrý», «Uly dalanyń jeti qyry» úndeýleri arqyly "Oıan, túrki álemi!" dep shaqyrady" degen Elshi endi túrki halyqtarynyń tarıhy tereń túrki mádenıeti men órkenıetin jandandyrýkerektigin basa aıtty.
“Alash ulttyq qozǵalysyn bastaǵan zııalylar tek qazaq dalasyn oılap qana qoıǵan joq, olar búkil Ortalyq Azııanyń bolashaǵyn oılady. Táýelsiz memleket qura almasa da, táýelsiz memlekette bolýy qajet barlyq sheshimderdi qabyldady" dedi ol.
Prof. Dr. Hýlııa Kasapoglý Chengel bolsa sóz kezeginde qazaq ult azattyq kúresi ókilderi men túriktiń ult azattyq kúresin júrgizgen tulǵalar arasynda óte jaqyn uqsastyq bar ekenin atap kórsetti." Olar - birdeı rýh, birdeı tebirenistiń tulǵalary. Qazirgi kúni Stalın óz týǵan jerinde umytylǵan kezde, Alash zııalylaryn búkil túrki elderi áspettep eske alady" dedi ol.
Prof. Dr. Ábdýaqap Qara bolsa óz sózinde Alash qozǵalysynyń máni men mańyzynyń tereńde jatqanyn basa aıtty." Aradan 100 jyl ótse de, bolashak urpaq olardy tolyq túsinýge áli de talpynýda" dedi ol.
Derekti fılm kórsetilimi Ankara turǵyndary, zııaly qaýym ókilder jáne jas zertteýshilerdiń kóńilinen shyqty.
Aıta ketelik, QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ «El» prodıýserlik ortalyǵymen birlese túsirgen ult-azattyq Alash qozǵalysy týraly syr shertetin «Alash týy astynda» derekti fılmi «Oıan, qazaq!», «Jarııalanbaǵan avtonomııa» jáne «Qaterli ótkel» dep atalatyn úsh bólimnen turady.
1918 jyldyń 8-23 qyrkúıegi aralyǵynda Reseıdiń Ýfa qalasynda memlekettik májilis ótti. Sol májiliste Alash qaıratkerleri ult-azattyq kúres múddesin zańdy túrde qorǵaýdyń úlgisin kórsetti. Bul derekti fılmniń kórsetilimi Alashordanyń 100 jyldyǵyna oraı arnaıy uıymdastyrylǵan.
Fılmdi túsirý toby Alash qaıratkerleriniń izimen Semeıdiń Alash qalasy atalǵan aýmaǵynda, Máskeýdegi Kreml, Sankt-Peterbýrgtegi Dýma otyrystary ótken Tavrııa saraıynda, Smolnyıda, Sankt-Peterbýrg, Qazan ýnıversıtetinde, Ýfadaǵy memlekettik májilis ótken burynǵy «Sibir» qonaqúıinde túsirý jumystaryn júrgizdi.