Túrkistan qalasyna kelgen Premer-mınıstrdiń birinshi orynbasary Asqar Mamın bastaǵan jumysshy top oblys ortalyǵynyń damý josparymen tanysty. Aldymen Otyrar móltek aýdanynda bolyp, ákimshilik-iskerlik ortalyqta boı kóterip jatqan nysandardy aralap kórdi. Oblys ákimi Janseıit Túımebaev móltek aýdandaǵy 26 kópqabatty turǵyn úıdiń qurylys jumystary barysymen tanystyrdy.
Qyrkúıek aıynda irgetasy qalanyp, memlekettik bıýdjet esebinen salynyp jatqan 60 páterli 20 turǵyn úıdiń 11-i (660 páter) 2019 jyldyń sáýir aıynda tapsyrylady. Al, 9 turǵyn úı (540 páter) keler jyldyń qarasha aıynda el ıgiligine berilmek. Kredıttik kópqabatty 6 turǵyn úıdiń (336 páter) qurylys jumystaryn 2019 jyldyń maýsym aıynda aıaqtap, paıdalanýǵa berý josparlanǵan. Sondaı-aq, onda memlekettik-jekeshelik áriptestik aıasynda 280 oryndyq balabaqsha paıdalanýǵa berilip, 900 oryndyq mektep aldaǵy jyly oqý jyly qarsańynda ashylatyn bolady. Odan bólek, iskerlik ortalyqta ákimshilik ǵımaraty, basqarmalar jáne departamentter úıleri jáne 5 juldyzdy «Rıksos» qonaq úıiniń qurylysy bastalǵan. Oblys ortalyǵyn ınfraqurylymmen qamtý josparymen jumysshy topty tanystyrǵan Túrkistan qalasynyń ákimi Álipbek О́serbaev ınjenerlik ınfraqurylym qazirgi tańda salynyp jatqan ákimshilik-iskerlik ortalyǵynyń 270 gektar jáne rýhanı-mádenı ortalyǵynyń 98 gektar aýmaǵyn qamtamasyz etýge múmkindik beretinin aıtyp ótti.
Sondaı-aq, jumysshy top «Áziret-sultan» memlekettik tarıhı-mádenı qoryǵyna aıaldap, Qoja Ahmet Iаsaýı kesenesiniń mańynan salynatyn tarıhı arhıtektýralyq jobalardyń nobaıymen tanysty. Atalǵan aýmaqtaǵy 98 gektar jerge rýhanı jáne mádenı ortalyq salynatyn bolady.
Al Túrkistan qalasyn damytýǵa arnalǵan jıynda Mádenıet jáne sport mınıstri A.Muhamedıuly Áziret Sultan kesenesiniń aınalasyn jańǵyrtýǵa baǵyttalǵan jobalarmen tanystyrdy.Alqaly jıynǵa, sondaı-aq Qoǵamdyq damý mınıstri D.Qaletaev, Enegetıka mınıstriniń orynbasary M.Myrzaǵalıev ózge de mınıstrlik ókilderi men ulttyq kompanııa basshylary qatysty. Túrkistan oblysynyń Janseıit Túımebaev aldaǵy ýaqytta júzege asyrylatyn jobalar jóninde tanystyrsa, birqatar mınıstrler men mınıstrlik ókilderi jumys josparlary jóninde baıandama jasady. «Astanagenplan» JShS-i dırektory S.Júnisov Túrkistan qalasyndaǵy jańa ákimshilik-iskerlik ortalyq nobaıyn kórsetti. Al «BI Group» JShS-niń ókili A.Zıkırın ákimshilik-iskerlik ortalyqta boı kóteretin turǵyn úı kesheni men Uly dala mýzeıi, týrıstik ortalyq, shyǵys monshasy, amfıteatr, Qoja Ahmet Iаsaýı mýzeıi, oqýshylar saraıy, oblystyq ǵylymı-ámbebap kitaphana, medıa ortalyq, «Astana» alańy, ortalyq stadıon syndy ǵımarattardyń jobasymen tanystyrdy. Jıyndy qorytyndylaǵan Premer-mınıstrdiń birinshi orynbasary Asqar Mamın qurylys jumystaryn jospardan keshiktirmeı der kezinde oryndaýdy tapsyrdy.
Ǵalymjan ELShIBAI,
«Egemen Qazaqstan»
Túrkistan oblysy.