Taldyqorǵan qalasyndaǵy «Aınalaıyn» balalar úıiniń tárbıelenýshisi, 5 synyp oqýshysy Irına Vesnına men № 1 balalar úıinde turatyn 7 synyp oqýshysy Ulyqpan Qabylbekov jetisýlyq jas órkenderge qýanysh syılaǵan mereke úshin Elbasyna shynaıy alǵys aıtty.
Al «Jarqyra, Qazaqstan! Jarqyra, týǵan jer!» atty taqyryppen ótken Prezıdent shyrshasyna aımaqtaǵy ata-anasynyń qamqorlyǵynsyz qalǵan, múmkindigi shekteýli jáne jetim balalar az qamtylǵan otbasylarynan shyqqan, balalar úıinde tárbıelengen oqýshylar, oqý úzdikteri shaqyrylyp, jalpy sany 200 bala shat-shadyman boldy.
«Jastar» saraıynda ótken Prezıdent shyrshasynyń kishkentaı qonaqtaryn tanymal ertegiler men mýltfılmderdiń keıipkerleri, anımatorlary, bıshiler, ánshiler men sırk ártisteri qarsy aldy. Balalar kógildir ekran arqyly óz quttyqtaýy men atalyq aq batasyn joldaǵan Elbasy Nursultan Nazarbaevtyń sózine uzaq qol soǵyp, rızashylyq bildirdi.
О́z kezeginde soń jetisýlyq jas órenderdi oblys ákimi Amandyq Batalov quttyqtap, izgi tilegin aıtty.
- Qymbatty balalar! Sender jańa ǵana el Prezıdentiniń ózderińizge arnaǵan júrekjardy lebizin tyńdadyńyzdar. Elbasy óz tileginde senderdiń táýelsiz, beıbit elde ómir súrip jatqan baqytty balalar ekenderińdi atap ótti. Osy qundylyqty saqtap, baǵalaı bilińder. Biz óz tarapymyzdan senderge jáne barlyq izgi bastamalarǵa árqashan qoldaý kórsetetin bolamyz. Eń bastysy, jaqsy oqyp, zeıindi bolyp, úlkendi qurmetteı bilińder. Bul mereke sender úshin uıymdastyrylyp otyr. Jańa jylda aıaýly armandaryń oryndalsyn, senderge myqty densaýlyq, kóterińki kóńil kúı tileımin! Kele jatqan Jańa jyl qutty bolsyn! 2019 jyl senderge mol qýanysh, jaqsy jańalyqtar alyp kelsin! – dedi Prezıdent shyrasyna qatysýshylarǵa aımaq basshysy.
Mereke barysynda balalarǵa qys mezgiliniń erekshelikteri men jańa jyldyq tańǵajaıyptar týraly teatrlandyrylǵan shoý kórsetilip, estelikter syılyq tabystaldy.
Qalmahanbet MUQAMETQALI,
«Egemen Qazaqstan»
Almaty oblysy