Indonezııanyń Zond buǵazy jaǵalaýynda bolǵan sýnamı saldarynan 280-nen astam adam qaza tapty.
Sýnamı saldarynan 1016 adam jaraqat alǵan jáne 57 adam iz-tússiz joǵalǵandar qatarynda. Sonymen qatar myńdaǵan úıler búlingen. Apat saldarynan eń qatty zardap shekken aýmaq – qaramaǵyna Ýdjýng-Kýlon ulttyq parki men tanymal kýrorttar kiretin Banten provınsııasyndaǵy Pandeglang okrýgi, dep habarlady Indonezııanyń Tótenshe jaǵdaılar jónindegi mekemesi. Tabıǵı apat 23 jeltoqsan kúni Iаva men Sýmatra araldaryn bólip jatqan buǵazda oryn alǵan.
«Men qatty shý estigen kezde úıde teledıdar kórip otyr edim. Aldymen, ony jel dep oılap qaldym. Bir kezde úıdiń ishin sý basa bastady. Kóshege júgirip shyqtym da, ekinshi tolqynnyń kele jatqanyn kórdim jáne osy kezde ǵana saqtanýym kerek ekendigin túsindim», deıdi Sýmatra aralynyń turǵyny Iýnı.
Sarapshylardyń aıtýynsha, sýnamıdiń oryn alýy týraly aldyn ala habarlaıtyn Indonezııadaǵy júıe jumysy óte tıimsiz jáne qural-jabdyqtary kónergen. Indonezııa prezıdenti Djoko Vıdodo apattan eń qatty zardap shekken Pandeglang aýdanyna bardy.
«Tolqyndardyń qaýip-qaterin anyqtaýǵa arnalǵan barlyq qurylǵyǵa tekserý júrgizýdi tapsyrǵanmyn. Jetispeı jatqan nemese isten shyqqan qural máselesin sheshý qajet», dep málimdedi Djoko Vıdodo.
Aıta keterlik jaıt, memlekettiń metereologııa agenttigi qatty tolqyn týraly eskertý jasasa da, sýnamı týraly habar taratýdy jón kórmegen. Qutqarý operasııasyna «Qyzyl Krest jáne Qyzyl Jarty aı» uıymy da qatysýda, onyń qyzmetkeri Ien Gelfand qaıǵyly oqıǵaǵa túsinikteme berdi:
«Bul Indonezııa úshin qaýipti jyl boldy. Osymen óńirde úshinshi dúleı zilzala oryn aldy. Qazir qutqarýshylar jumys isteýde, olarǵa Qyzyl Krest eriktileri de qosyldy, bizden 70-ten astam adam bar. Adamdardy tiri tabýǵa degen úmit áli de bar. Degenmen zardap kólemi – óte úlken. Meniń oıymsha, árdaıym úmit úzbeý kerek, biraq qaza tapqandardyń sany kóbeıýi de múmkin», deıdi ol.
Aıta keteıik, Indonezııa osy jyly tabıǵı apattan qatty zardap shekti. Jazda Lombok pen Sýlavesı araldarynda qatty jer silkinisi bolyp, onda eki myńnan astam adam qaza tapty, 14 jyl buryn Indonezııada sýnamı kesirinen 200 myńnan astam adam kóz jumǵan.
Qarlyǵash QURAMYS,
«Egemen Qazaqstan»