Qyzyljar aýdanynyń ortalyǵy Beskól kentinde jumys isteıtin «Mereı» óner mektebinde úsh júzge jýyq tárbıelenýshi bar.
Solardyń biri Aqbota Qazbekova Astana, Kókshetaý, Qaraǵandy, Petropavl qalalarda ótken baıqaýlarda oza shaýyp, halyqaralyq «Tańǵy shuǵyla» festıvalinde gran-prıdi jeńip aldy. Jasaral Eńsepovtyń «Balbulaq» kúıin náshine keltire oryndap, 23 úmitkerdiń ishinen eń úzdigi atandy.Ol tórt jyldyń ishinde kóptegen kúılerdi meńgergen.
«Dombyra synybyna 40 bala qatysady. Olarǵa úsh ustaz sabaq beredi.Bilim bólimi men ákimdik únemi qarjylaı qoldaý kórsetedi», deıdi dombyra synybynyń oqytýshysy Tatıana Býkırova.
О́ner mektebiniń dırektory Álııa Seńkibaevanyń aıtýyna qaraǵanda bir balalardyń ulttyq ónerge degen yqylasy erekshe. Bıyl 30 tárbıelenýshi ónerdiń túrli baǵyty boıynsha respýblıkalyq saıystardan jeńimpaz bolyp oralsa, tórteýi-gran-prı ıegeri. Munda vokal, kórkem sýret, horeografııa, barlyq aspapta oınaý bólimderi jumys isteıdi. Balalar sportqa da baýlynady.
О́mir ESQALI,
«Egemen Qazaqstan»
Soltústik Qazaqstan oblysy