Eýrazııalyq Top (ERG) quramyndaǵy «Eýroazıattyq energetıkalyq korporasııasy» AQ Aqsý elektr stansasy 50 jyldyq mereıtoıyn atap ótti.
Stansa osy ýaqyt aralyǵynda 587 mlrd. Kvt/saǵat elektr energııasyn óndiripti.
Qazirgi kezde stansa Eýrazııalyq Top quramyndaǵy barlyq kásiporyndy energııa qýatymen qamtyp otyr. Alyp óndiris ornynyń 50 jyldyq mereıtoıyna oblys ákimi Bolat Baqaýov, «ERG» kompanııasynyń basqarma tóraǵasy Aleksandr Mashkevıch, ózge de kásiporyn basshylary, stansada eńbek etken ardagerler qatysty.
Stansada elimizdegi elektr energııasynyń 5/1 bóligi óndiriledi. Indýstrııalandyrý talaptaryna sáıkes, qazir stansadaǵy 8 bloktyń 5-ýi jańǵyrtýdan ótti.
Eýrazııalyq Top sońǵy 7 jylda óńirdiń damýy úshin 18 mlrd. teńge qarjy bólgen. Top óńirge qajetti áleýmettik jaýapkershilik talaptaryn oryndaýda.
«ERG» kompanııasynyń basqarma tóraǵasy Aleksandr Mashkevıch Aqsý elektr stansasy kompanııa quramyna ótken kezin eske aldy.
- Biz 1996 jyly stansaǵa alǵash kelgende qańyrap bos qalǵan bazalar, terezesi synǵan óndiristik ǵımarattar turǵan edi. Energetıkterdiń bizge senim artyp, birlese jumys jasaýdyń nátıjesinde bul kúnderi TMD aýmaǵyndaǵy úzdik kásiporyn dárejesine jettik,-dedi A. Mashkevıch
Al, elektr energııasy óndirilmese, zaýyttar da bolmas edi. Qazir balamaly energııa kózderi de paıda boldy. Biraq, kómirden energııa alý áli qoldanysta. Arzan qýat óndirilýde.
Mereıtoı barysynda stansanyń 100-ge jýyq energetık jáne jumysshy,qyzmetkerlerine qurmet kórsetildi. Kólikter berildi.
Merekelik keshte belgili ánshi Álibek Dinishev jáne jergilikti ónerpazdardyń qatysýymen konsert ótti.
Farıda BYQAI,
«Egemen Qazaqstan»
Pavlodar oblysy