Jańa jyldan árkim áserli sátterge toly ǵajaıyp kúı kútedi. Kókshetaý qalasynyń búldirshinderi úshin de bıylǵy mereke qýanyshty sátterge toly. Oblys ortalyǵyndaǵy meıramhanalardyń birinde múmkindigi shekteýli balalarǵa arnaıy jańa jyldyq kesh uıymdastyryldy.
Jańa jyl merekesiniń qııal-ǵajaıypqa senetin balalar úshin erekshe orny bar. «Nur Otan» partııasy oblystyq fılıaly jáne «Promoteı» qoǵamdyq qorynyń qoldaýymen «Spesıalnaıa Olımpıada Kokshetaý» qoǵamdyq qory múmkindigi shekteýli balalarǵa arnap jańa jyldyq merekelik konsert uıymdastyrdy. Sharanyń ashylý saltanatynda qoǵamdyq birlestik mamandary men №1 arnaıy korreksııalyq mektep-ınternatynyń ujymy balalardy jańa jylmen quttyqtap, jyly lebizderin bildirdi.
– Arnaıy korreksııalyq mektep-ınternatynyń atynan búgingi keshti uıymdastyryp otyrǵan «Spesıalnaıa Olımpıada Kókshetaý» qoǵamdyq birlestigine alǵysym sheksiz. Ártúrli merekelik sharalarda bizdi nazardan tys qaldyrmaıdy. Jaqsylyq eshqashan da artyq bolmaıdy,– deıdi №1 arnaıy korreksııalyq mektep-ınternatynyń muǵalimi Gúlshat Qusaıynova.
Áýezdi án jáne ásem bımen órilgen merekelik shara balalarǵa qýanysh syılady. Barsha balalar Aıaz ataǵa óleńderin oqyp, demeýshiler daıyndaǵan jańa jyldyq syılyqtarǵa ıe boldy.
–Úlken rahmet. Munda bári tamasha ári ádemi. Jańa jylda barlyq adamdarda tek jaqsylyq bolyp, kóńilderi jabyrqamasyn. Shyrshamyz jarqyraı bersin!,–deıdi №1 arnaıy korreksııalyq mektep-ınternatynyń oqýshysy Vıktorııa Lýkashenko.
Rasynda da jańa jylda kez-kelgen adam ǵajaıypqa senedi, sony kútip, úmittenedi. Balalar bolsa, Aıaz ataǵa ózderiniń júrekjardy qalaýlaryn jazyp, armandarynyń oryndalýyn asyǵa kútedi. Múmkindigi shekteýli balalarǵa jańa jyldyq merekede umytylmas sátter qaldyrý úshin jomart jandar baryn saldy.
Baıqal BAIÁDIL,
«Egemen Qazaqstan»
Aqmola oblysy