Fransııadaǵy Qazaqstan Elshiliginiń málimetine saı, Parıjdegi naýbaıhanalardyń birinde bolǵan jarylystan qaza tapqandar men jaralanǵandar arasynda Qazaqstan azamattary joq. Bul týraly «Habar 24» arnasy xabarlady.
«Parıj prokýratýrasy tergeý jumystaryn júrgizip jatyr. Onyń barysynda qaıǵyly oqıǵanyń naqty sebep-saldary anyqtalatyn bolady. Keleńsiz jaǵdaı oryn alǵan jerdegi qonaqúılerge ornalasqan adamdar men sol mańdaǵy úılerdiń turǵyndary evakýasııalandy. Bılik oryndary jarylystan qıraǵan páter ıeleriniń ýaqytsha baspanalarǵa ornalastyrylǵandyǵyn málimdedi», dep habarlady «Habar 24» arnasynyń menshikti tilshisi Alııa Syzdyqova.
Eske sala ketsek, budan buryn qala ortalyǵynda gazdyń jarylýynan tórt adam qaza tapqandyǵy aıtylǵan bolatyn. Mert bolǵandardyń ekeýi - órt sóndirý qyzmetiniń jumysshylary. Qutqarýshylardyń deregine qaraǵanda, oqys oqıǵa saldarynan 30 adam jaraqat alǵan, olardyń 12-si aýyr jaǵdaıda. Jergilikti polısııanyń málimetinshe, keleńsiz jaǵdaı senbi kúni tańerteń qalanyń toǵyzynshy aýdanyndaǵy Trevız kóshesinde bolǵan. Sondaı-aq SIM baspasóz qyzmeti Fransııadaǵy QR Elshiligi zardap shekkender arasynda Qazaqstan azamattarynyń bar-joǵyn anyqtap jatqandyǵyn málim etken edi.