Arqasyn keńge salyp, oryndyqta pańdanyp otyrǵan Gagarındi kórdińiz be? Iá, sol, adamzat tarıhynda alǵash bolyp ǵaryshqa attanǵan Gagarınniń dál ózi. Kórmeseńiz, Almatyǵa kelińiz. Shahardaǵy ǵaryshkerdiń atymen atalatyn dańǵylǵa jaqyn jerde oryn tepken oryndyqtardyń birinde Iýrıı Gagarın beınelengen ınstalıasııa paıda boldy.
Qoıylǵanyna kóp bola qoımaǵan osynaý art-obekt qala qonaqtary úshin sýretke túsetin keremet oryn ǵana emes, ótken kúnniń óshpes belgisindeı kórinedi. О́ıtkeni adamzat tarıhynda alǵash ret Iýrıı Gagarın qazaq dalasynan ǵaryshqa attanǵan bolatyn. Joba avtorlary − Júrgenov atyndaǵy Qazaq óner akademııasynyń stýdentteri Azamat Qabyl men Aqylbek Sháken. Jas týyndygerlerge óz ıdeıasyn iske asyrýǵa «BI Group» qurylys kompanııasy qoldaý kórsetipti.
«Bizdiń oıymyzsha, skýlptýra qala landshaftymen jaqsy úndestik taýyp tur. Shaharymyzda mundaı nysandar kóbeıip keledi. Olardyń árbiriniń qaıtalanbas tarıhy men ózine tán erekshelikteri bar. Onyń ústine bul jas sýretshilerdiń qalyptasýyna oń yqpal etedi», – deıdi Azamat Qabyl.
Buǵan deıin Almatydaǵy Tólebaev kóshesiniń boıyna «Kıno» tobynyń solısi Vıktor Soıǵa eskertkish qoıylǵan edi. Bul destınasııa qazir jas mýzykanttar men qala qonaqtary úshin jıi keletin orynǵa aınalǵan.
Arman OKTIаBR,
«Egemen Qazaqstan»
ALMATY