Qasym-Jomart Toqaevtyń tóraǵalyq etýimen Parlament Senatynyń otyrysy boldy.
Senatorlar Qazaqstan men Tájikstan arasyndaǵy kóshi-qon salasyndaǵy úkimetaralyq kelisimdi ratıfıkasııalady.
2018 jylǵy 14 naýryzda Astanada qol qoıylǵan Kelisim kóshi-qon salasyndaǵy eki el arasyndaǵy yntymaqtastyqtyń quqyqtyq negizderin jasaýǵa baǵyttalǵan. Qujat kóshi-qon úderisterin, pana jáne azamattyq usyný tártibin, zańsyz kóshi-qonmen kúresýdi uıymdastyrýdy retteıtin bolady. Kelisimdegi bir tarap azamattarynyń ekinshi taraptyń azamattyǵyn qabyldaý týraly aqparat pen málimetterdi ózara almasý qarastyrylady. Kelisimge qatysýshylar eńbek resýrstaryn tartý salasyndaǵy memlekettik organdar men sharýashylyq sýbektileri arasyndaǵy yntymaqtastyq boıynsha mindettemelerdi ózderine qabyldaıdy.
Qazaqstan men Tájikstan arasyndaǵy adamdardyń readmıssııasy týraly kelisim jáne osy kelisimdi iske asyrý tártibi týraly Atqarý hattamasy ratıfıkasııalandy.
Kelisim jáne Atqarý hattamasy memleketterdiń aýmaǵyna ulttyq zańnamany buza otyryp kirgen nemese onda júrgen adamdardy memleketterdiń quzyretti organdarynyń berýi jáne qabyldaýy máseleleri boıynsha úkimetter arasyndaǵy yntymaqtastyqtyń quqyqtyq negizderin jasaýǵa baǵyttalǵan. Memleketteriniń aýmaǵyna kelý, onda bolý nemese turý sharttaryn oryndamaıtyn nemese oryndaýdy toqtatqan adamdardy anyqtaý jáne olardy qaýipsiz, rettep qaıtarý úshin tıimdi rásimderdi aıqyndaıdy, sondaı-aq osyndaı adamdardyń tranzıtine yqpal etedi.
Otyrysta Qazaqstan men Tájikstan arasyndaǵy Qazaqstan Respýblıkasy azamattarynyń Tájikstan Respýblıkasynyń aýmaǵynda jáne Tájikstan Respýblıkasy azamattarynyń Qazaqstan Respýblıkasynyń aýmaǵynda bolý tártibi týraly úkimetaralyq kelisim de ratıfıkasııalandy.
Qujat eki el azamattarynyń basqa taraptyń aýmaǵynda 30 kúnge deıingi merzimde mindetti tirkeýsiz bolý, sondaı-aq memlekettik shekaradan ótkennen keıin mindetti tirkeýmen 90 kúnge deıin bolý múmkindigin qarastyrady.
Senatorlar 2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýy týraly shartqa ózgeris engizý týraly hattamany ratıfıkasııalady.
2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýy týraly shartpen qoldanystaǵy kedendik ákelý bajdarynyń somalaryn bólý normatıvteriniń merzimin 2018 jylǵy 12 tamyzǵa deıin dep aıqyndaǵan bolatyn.
Osy Hattamada qoldanystaǵy kedendik ákelý bajdarynyń somalaryn (Armenııa Respýblıkasy – 1,220 %, Belarýs Respýblıkasy – 4,560 %, Qazaqstan Respýblıkasy – 7,055 %, Qyrǵyz Respýblıkasy – 1,900 %, Reseı Federasııasy – 85,265 %) bólý normatıvterin 2019 jylǵy 31 jeltoqsanǵa deıin uzartý kózdelip otyr.
Otyrys barysynda senatorlardyń depýtattyq saýaldary jarııa etildi. Dınar Nóketaeva qant dıabetimen aýyratyn balalardy qoldaý qajettigi; Álı Bektaev agrarlyq sala mamandaryn daıarlaý máselelerine qatysty; Sáýle Aıtpaeva salamatty ómir saltyn nasıhattaý týraly; Edil Mamytbekov qara jáne tústi metaldardy jınaýdy retke keltirý týraly másele kóterdi.