Partııa aıasynda aýyldy damytý máselesi qaraldy

Keńestiń kún tártibinde Memleket basshysy N.Nazarbaev halyqqa Joldaýynda usynǵan «Aýyl – el besigi» arnaıy jobasyn iske asyrý máselesi qaraldy. Otyrysty ashqan keńes tóraǵasy B.Tileýhan osyǵan deıin aıtylǵan 37 usynystyń 4-ýi oryndalmaǵanyn, onyń sebebin tıisti mınıstrlik ókilderi zańnamalyq talaptarmen túsindirgenin tilge tıek etti. 

Jıynda Qoǵamdyq damý vıse-mınıstri J.Qajykenqyzy men Aýyl sharýashylyǵy vıse-mınıstri A.Qaı­ratuly «Rýhanı jańǵyrý» baǵ­darlamasy aıasynda atqarylǵan naqty isterge toqtalyp, «Aýyl – el besigi» jobasy tóńiregindegi alda jos­parlanatyn jumystarǵa keńes mú­she­lerinen naqty usynystar kúte­tinin aıtty. 

Al qoǵam qaı­rat­keri Aldan Smaıyl aýyldyń ál-aýqatyn jaqsartý úshin onyń ekonomı­kasyn kóterý kerektigine toqtaldy. Ja­qynda ortalyq óńirlerdegi eldi mekenderdi aralaǵanyn aıtqan A.Smaıyl malmen jan baqqan jurtshylyqtyń máselesi kóp ekenin, kásipkerlerdiń semirtip baqqan malyn ótkize almaı júrgenin jetkizdi. Osy olqylyqtardy sheshetin arnaıy kásiporyndar máselesin jolǵa qoıýdy usyndy. 

Al til janashyry Orazkúl Asan­ǵazy qazaq tiliniń tuǵyry bıik bolmaýy aýyl máselesine de áserin tıgi­zetinin, mınıstrlik nemese jo­ǵary jaqtaǵy mamandardyń aýyl­daǵy kásipkerlerge «Sybaǵa» baǵ­dar­lamasynyń ózin qarapaıym tilde túsindire almaıtynyn aıtty. 

Aýylǵa barǵan «Serpin» baǵdar­lamasy túlekteriniń 70 paıyzy nege ketkenin jetkizgen M.Ábenov aýmaq­tyq ákimshilik tarapynan naqtyly qoldaý bolmaǵanyn, baǵdarlamanyń maqsaty tolyq oryndalmaı otyr­ǵanyn sóz etti. 

Al bloger Iаkov Fedorov orman sha­rýashylyǵynda jas mamandar joq­tyń qasy eke­nin aıtsa, Senat depýtaty Dınar Nóketaeva aýyl­dar­daǵy qyz-ke­linshekter qolǵa alǵan halqymyzdyń ata­kásibin násip etýine jaǵdaı jasaý qajettigine toqtaldy.

Keńesti qorytyndylaǵan B.Ti­leý­han jıynda aıtylǵan usynys­tar­dyń hattamaǵa tirkelip, tıisti ve­do­mstvolarǵa arnaıy joldanatynyn jetkizdi.

Aıdana ShOTBAIQYZY,

«Egemen Qazaqstan»