Búgin Ishki ister mınıstrligi Memlekettik til jáne aqparat departamentiniń dırektory Almas Sadýbaev «Ohotzooprom» О́B RMQK ınspektory Erlan Nurǵalıevtiń ólimine qatysty úsh kúdiktiniń ustalǵany jóninde málimdeme jasady.
Eske salsaq, bıylǵy 15 qańtar kúni Qaraǵandy oblysynyń Nura aýdanynda «Ohotzooprom» respýblıkalyq mekemesiniń ınspektory Erlan Nurǵalıev kıikter men sırek kezdesetin janýarlardy qorǵaý reıdi kezinde brakonerler qolynan aýyr jaralanyp, artynsha qaza tapqan bolatyn.
Kúdiktilerdiń arada bir aptadaı ýaqyt ótkennen keıin polısııa quryǵyna ilikkeni týraly habar alysymen marqumnyń Astana qalasynda turatyn inisi Nurlan Nurǵalıevke telefon arqyly habarlasyp, mán-jaıdy surastyrǵan edik.
– Nurlan Balǵabekuly, aǵańyz – «Ohotzooprom» respýblıkalyq mekemesiniń ınspektory Erlan Nurǵalıevtiń ólimine qatysy bar degen úsh kúdiktiniń ustalǵany týraly aqparat týrasynda ne aıtasyz?
– Jalpy, budan buryn osy qylmysqa qatysy bar tórt adam óz erkimen kelip, Qyzylorda oblysynyń bir aýdanyndaǵy polısııa bólimine berilgen bolatyn. Al búgin ustaldy degen úsh kúdiktini oqıǵa bolǵannan keıin eki kún ótkende Qyzylorda qalasyna kire beriste polısııa qyzmetkerleri ustaǵan. Sol kezde olar mingen avtokólik qarbalas sátti paıdalanyp, qashyp ketken degen derek bar. Soǵan qaraǵanda, sol kóliktiń ishinde polısııa qyzmetkeri bolǵan-aý degen kúdigim bar.
– Jalpy, óz basyńyz tergeý amaldarynyń ádiletti túrde ótetinine, qylmysqa qatysy barlardyń laıyqty jazalaryn alatynyna senemdisiz be?
– Osy oqıǵanyń kýágeri, Erlannyń janynda bolǵan Petr Nısyk áli kúnge deıin aýrýhanaǵa jatqyzylmaǵan. О́ziniń basy ońbaı jarylǵan eken. Keshe baryp, ózimen kezdestim. Úreıli kórindi, úıinde tyǵylyp otyrǵandaı áser qaldyrdy. Alaıda, sózine qaraǵanda, búgingi kúnge deıin oǵan eshkim qysym jasamapty, qorqytý-úrkitý degen atymen bolǵan joq dep otyr...
Negizi, kúdiktilerdiń bári qolǵa tústi ǵoı, endi tergeý amaldarynyń ádiletti júrgizilýin qadaǵalaıtyn bolamyz. Erte me, kesh pe, bári de sorpa betine shyǵady dep oılaımyn.
– Qazir áleýmettik jelide qyzmet babynda qaza tapqan Erlan Nurǵalıevtiń rýhyna laıyqty qurmet kórsetý týraly usynystar aıtylyp jatyr. Mysaly, jeli qoldanýshylary marqumǵa eskertkish qoıyp, kóshe ataýyna onyń esimin berý kerek degen másele kóterdi.
– Meniń armanym – týǵan aýylymyz Barshynda meshit salyp, oǵan Erlannyń atyn berý. Oǵan meniń jalǵyz ózimniń shamam kelmeıdi. Kóp bolyp qolǵa alynsa, bul degenińiz aǵamnyń rýhyna kórsetilgen zor qurmet bolar edi. Menińshe, erlikpen qaza tapqan Erlan Nurǵalıevtiń esimin osylaısha este qaldyrǵan jón dep oılaımyn. Al endi, joǵaryda aıtylǵan usynystarǵa esshqandaı qarsylyǵym joq. Aǵam – men úshin naǵyz qaharman!
Al Erlan aǵam qyzmet etken «Ohotzooprom» respýblıkalyq mekemesi qoldan kelgen kómekten aıanyp jatqan joq. Jalpy, osy oqıǵaǵa qatysty ún qosyp, azamattyq kózqarastaryn tanytyp, qoldaý bildirip jatqan barsha qazaqstandyqtarǵa basymdy ıip, alǵys aıtqym keledi!
Áńgimelesken
Qaırat ÁBILDA,
«Egemen Qazaqstan»
QARAǴANDY