1-2 aqpan aralyǵynda Astanada tennısten Devıs kýbogynyń kezeńdik saıysy ótedi. Bul básekede Qazaqstan men Portýgalııa quramalary sheberlik baıqasady.
Osy matchta jeńiske jetken komanda kelesi jyldyń qarasha aıynda bastalatyn Devıs kýbogynyń fınaldyq saıystaryna joldama alady. Jerlesterimizdiń álemdegi eń úzdik komandalar qataryna qosylýǵa tamasha múmkindigi bar. Jasyratyny joq, qazirgi kezde Portýgalııa quramasy asa qarýly emes. Búgingi tańda aıtýly memlekettiń bir ǵana ókili dúnıejúzilik reıtıngte «TOP-100» oıynshynyń qataryna qosylyp otyr. Ol – álemniń 44 raketkasy Joao Soýza. Pıreneı túbeginiń odan keıingi myqtysy Pedro Soýza ATR reıtınginde 103 oryndy ıelenýde.
Al Qazaqstan quramasy músheleri arasynda eń jaqsy kórsetkish Mıhaıl Kýkýshkınge tıesili. Elimizdiń birinshi raketkasy úzdikter tiziminde 56 orynǵa turaqtady. Sondaı-aq, «TOP-200» tennısshiniń qatarynda Aleksandr Býblık (164 oryn) pen Aleksandr Nedovesov (193 oryn) bar. Jáne de 2011 jyldan beri Qazaqstannyń tennısshileri aıtýly jarystyń shırek fınalynda bes márte óner kórsetkenin eskergen jón.
Daıyndaǵan Ǵalym SÚLEIMEN,
«Egemen Qazaqstan»