Qazaqstan Prezıdenti is-shara aldynda jastardyń kıimder, sportshylarǵa arnalǵan taǵamdar óndirisi men ınteraktıvti qyzmet kórsetý platformalaryn qurý jónindegi birqatar jobamen tanysyp, Úkimetke bul bastamalardy júzege asyrýdy jáne ilgeriletýdi erekshe baqylaýǵa alýdy tapsyrdy.
Memleket basshysy jıynǵa qatysýshylardy Jastar jylynyń ashylýymen quttyqtap, bul sharanyń keleshek urpaq úshin mańyzy zor ekenin atap ótti.
– Jastar – elimizdiń qazirgi álemdegi básekege qabilettiliginiń negizgi faktory. Qazaqstannyń bolashaǵy sizderge – sizderdiń bilimderińizge, kúsh-jigerlerińiz ben patrıottyq sezimderińizge baılanysty. Qazir qolǵa alynǵan jumystardyń bári sizderdiń baqytty ómirlerińiz, sondaı-aq óz áleýetterińiz ben múmkindikterińizdi tolyq júzege asyra alý úshin atqarylyp jatyr, – dedi Nursultan Nazarbaev.
Qazaqstan Prezıdenti iri qalalardaǵy jas otbasylardyń turǵyn úı problemalarynyń ózektiligin atap ótip, bul máseleni sheshý úshin turaqty kiris bolý kerektigin, sondaı-aq, adamnyń jaqsy turmysynyń negizgi kózi – jumys ekenin aıtty.
– О́tken jyly Qazaqstanda orta mektepti 125 myńnan astam jas túlek bitirip shyqty. Keleshekte eńbek naryǵyna shyǵatyn jastardyń sany arta túspek. Qazirgi ýaqytta elimizde 300 myńǵa jýyq adam nemese jastardyń 9 paıyzy oqýǵa jáne eńbekke tartylmaǵan. Bul sanatqa jatatyn jastardyń sanyn azaıtýǵa septigin tıgizetin tıimdi sharalar qabyldaý qajet, – dedi Memleket basshysy.
Nursultan Nazarbaev tehnıkalyq jáne kásibı bilim berý júıesin sapaly damytýdyń negizgi basymdyqtaryna arnaıy toqtaldy.
– «100/200» qaǵıdaty negizinde «Jas maman» baǵdarlamasyn ázirleý qajet. Úsh jyl ishinde bul joba elimizdiń barlyq óńiri boıynsha 200 myńǵa jýyq jas azamatty qamtıtyn bolady. Osy joba aıasynda jańǵyrtylǵan 200 oqý ornynyń bazasynda suranysqa ıe 100 ındýstrııalyq jáne qyzmet kórsetý mamandyqtary boıynsha kadr daıarlaý iske asyrylady, – dedi Qazaqstan Prezıdenti.
Sońynda Memleket basshysy Úkimet pen jergilikti atqarýshy organdarǵa arnaıy Jol kartasyn ázirleýdi tapsyrdy. Bul jas qazaqstandyqtardy qoljetimdi ári sapaly bilim, jumys, turǵyn úı jáne otbasyn qurý jónindegi mańyzdy qajettiliktermen qamtamasyz etýdi kózdeıtin naqty qoldaý sharalaryn qamtýǵa tıis.
Elbasynyń sóılegen sóziniń tolyq mátinin myna jerden oqı alasyzdar.