Qazaqstan Respýblıkasy Tuńǵysh Prezıdenti – Elbasynyń Qory, Qazaqstannyń Isker áıelder qaýymdastyǵy jáne «Habar» Agenttiginiń birlesýimen «Qaıyrymdylyq kerýeni» respýblıkalyq baıqaýyna qatysty Almatyda baspasóz máslıhatyn ótkizgen uıymdastyrýshylar qaıyrymdylyqty dáripteý, belsendi azamattyq bastamalardy damytýdy maqsat etetin jobanyń baǵyt-baǵdary týraly BAQ ókilderimen bólisti.
О́tken jyldyń qarasha aıynan bastalǵan «Qaıyrymdylyq kerýeni» respýblıkalyq baıqaýyna úmitkerlerdi tirkeý qazirgi kezde jalǵasyn tabýda.
Áleýmettik, qoǵamdyq problemalardy sheshýge jáne ózderiniń jomarttyǵymen basqalardy meıirimdilikke yntalandyrýǵa úles qosyp júrgen jekelegen azamattar men zańdy tulǵalar óz usynystaryn aǵymdaǵy jyldyń 9 aqpanyna deıin joldaıtyn bolady. Osyndaı málimettermen bólisken Almaty qalasy boıynsha Qazaqstan Isker áıelder qaýymdastyǵy tóraıymynyń orynbasary Balym Bataeva, Almaty qalasy boıynsha «Rýhanı jańǵyrý» jobasynyń jetekshisi Gúlnar Qońyrova, Isker áıelder qaýymdastyǵynyń Basqarma músheleri Nazym Ahmatjanova, Jazıra Chaıarova, qaýymdastyq múshesi Sana Jandaı BAQ ókilderiniń suraqtaryna jaýap berip, elimizdiń kez kelgen azamatyn qaıyrymdylyq sharalaryna árkez daıyn bolýǵa úndeıtin osyndaı jobanyń ómirsheń bolýy baıqaý qorytyndysynda nasıhattalatyn ıgi istermen baılanysty ekendigin aıtady.
Elimizdiń barlyq óńiri boıynsha ótetin irikteý sharalarynan keıin Qazaqstannyń Isker áıelder qaýymdastyǵyna joldanǵan barlyq usynystar nazarǵa alynyp, úmitkerler bes atalym boıynsha «Asar» (nomınasııa halyqtyń salt-dástúrimen baılanysty qaıyrymdylyq qyzmet kórsetetin adamdarǵa qoldaý kórsetýge baǵyttalǵan); «Týǵan jer» (bilim berý, ekologııa jáne kóriktendirý salasynda týǵan ólkege kómek kórsetetin adamdarǵa beriledi); «Meıirim jolynda» (atalymǵa erikti negizde jáne tegin kómek kórsetetin, ıgi ister atqaratyn adamdar ıe bolady); «Batyl júrek» (nomınasııa erlik is jasaǵan, jankeshtilik tanytqan adamǵa qoldaý kórsetý maqsatynda taǵaıyndalady); «Qaıyrymdylyq tarıhy» (nomınasııa BAQ-ta qaıyrymdylyq taqyrybyn qozǵaıtyn, qoǵamnyń nazaryn áleýmettik problemalarǵa aýdartatyn materıaldardyń jarııalanýyn qamtamasyz etetin jýrnalısterge nemese shyǵarmashylyq ujymǵa beriledi).
Baıqaýǵa kásipkerlik nysandary jáne qaıyrymdylyq qyzmetti memlekettik qoldaý arqyly júrgizetin tulǵalar (memlekettik grant, memlekettik tapsyrys jáne t.b.) qatystyrylmaıdy.
Elvıra SERIKQYZY,
«Eqemen Qazaqstan»
ALMATY