Qazaq ulttyq qyzdar pedagogıkalyq ýnıversıtetinde tuńǵysh ret Halyqaralyq Bilim kúnine arnalǵan jıyn ótti.
IýNESKO-nyń Qazaqstan, Qyrǵyzstan, Tájikstan jáne О́zbekstan boıynsha Klasterlik bıýrosy ókilderi, joǵary oqý oryndarynyń oqytýshylary men bilim berý uıymdarynyń qyzmetkerleriniń qatysýymen ótken basqosýda Qazaqstannyń 2030 jylǵa deıin turaqty damýyn qamtamasyz etýge yqpal etetin 17 basym baǵyttaǵy bilim berýdiń mańyzy anyqtalyp, ony keńinen nasıhattaý turǵysynda birqatar mańyzdy mindetter keńinen talqylandy. Sonymen qatar keńes qatysýshylary saladaǵy túıitkildi máselelerdi sheshý joldaryn da qarastyrdy.
Jıyndy Strategııalyq damý jáne halyqaralyq baılanystar jónindegi prorektory Lazzat Býlebaeva ashyp, sharanyń mańyzy týrasynda oı órbitti.
– О́zindik dara dástúri bar – Qyzdar ýnıversıteti otandyq joǵary oqý oryndarynyń arasynda tek qyzdardan pedagog mamandaryn daıarlaıtyn álemdegi biregeı bilim ordasy. Ataýly kúnniń bilim men ǵylym qarashańyraǵynda atalyp ótilýi ýnıversıtet qyzmetimen tikeleı baılanysty jáne sımvoldyq máni bar dep oılaımyn. Elimiz bilim berý salasyndaǵy genderlik teńdik krıterııi boıynsha álemdik reıtıngte joǵary kórsetkishke ıe. Barshańyzǵa belgili, Qazaqstanda bilim alýshylar arasynda genderlik shekteý nemese teńsizdik joq. Otandyq joǵary oqý oryndaryndaǵy stýdentter, magıstranttar men doktoranttardyń arasynda qyzdardyń úles salmaǵy basym. «Bolashaq» stıpendııasynyń ıegerleriniń tiziminde de názikjandylardyń sany kóp, – dedi L. Býlebaeva.
Sondaı-aq ol osy tarapta atqarylyp jatqan birqatar jumystarǵa da toqtalyp ótti.
– Ulttyń bolashaǵy, urpaqtyń keleshegi – qyzdarǵa tikeleı baılanysty. Ýnıversıtet óz qyzmetinde Memleket bolashaǵyn tárbıeleýge súbeli úles qosatyn bolashaq muǵalimderdiń san qyrly bolýyn, olardyń qoǵamdaǵy áleýmettik jáne otbasyndaǵy etnoáleýmettik rólderdi múltiksiz atqarýyn basty nazarda ustaıdy. Osy oraıda stýdentterdiń zııatkerlik jáne shyǵarmashylyq áleýetin kóterý maqsatynda úıirmeler, robototehnıka kabıneti jumys isteıdi, sondaı-aq bilimgerler startap konkýrstar men ǵylymı konferensııalarǵa jáne olımpıadalarǵa turaqty túrde qatysady. STEM tásili boıynsha aǵylshyn tilinde sabaq berý de júrgizilýde. Bul bastama – oqý orny túlekteriniń básekege qabilettigin arttyryp, olardyń jumyspen qamtamasyz etýine yqpal jasaıdy. Bizdiń oqý orny stýdentteriniń basym bóligi aýyldyq mektepterdiń túlegi ekendigin eskeretin bolsaq, atalǵan bilim uıalary jańa bilim berý baǵdarlamalaryn tolyqqandy meńgerip, jete tanysqany óte mańyzdy, – dep atap ótti Lazzat Býlebaeva.
Qyzdar ýnıversıtetiniń bastamasymen elimizde alǵash ret atalyp ótilip otyrǵan ataýly data Birikken Ulttar Uıymynyń Bas Assambleıasynyń bekitýimen ótken jyldyń jeltoqsan aıynda qabyldanǵan bolatyn. Oqý orny men IýNESKO-nyń Qazaqstan, Qyrǵyzstan, Tájikstan jáne О́zbekstan boıynsha Klasterlik bıýrosynyń ózara yntymaqtastyǵy nátıjesinde almatylyq jas ǵalymdardyń bastamasymen Jastar jyly qarsańynda qolǵa alynǵan birqatar jobalar men bastamalar kópshilik nazaryna usynyldy. Sonymen qatar IýNESKO ókilderi taqyrypqa oraı prezentasııa jasap, bilim berýdiń mańyzyna keńinen toqtaldy.
Sharada Qyzdar ýnıversıtetiniń jas pedagog-ǵalymdarynyń bastamasymen «t2t Networking» atty jobanyń máni kópshilik nazaryna usynyldy. Ýnıversıtet bazasynda qurylǵan Qazaqstannyń jas pedagog-ǵalymdary qaýymdastyǵynyń uıytqy bolýymen qolǵa alynǵan joba orta bilim berý salasynda basshylyq qyzmet atqaratyn ýnıversıtet túlekteri men elimizdiń pedagogıkalyq joǵary oqý ornyndaǵy jas ǵalymdardyń ortaq dıalog alańyn quryp, aýyldyq jerde ornalasqan mektepterdiń ǵylymı-pedagogıkalyq áleýetin kóterýdi maqsat tutady. Bul bastama – oqý orny túlekteriniń básekege qabilettigin arttyryp, olardyń jumyspen qamtamasyz etýine yqpal jasaıdy. Ýnıversıtet stýdentteriniń basym bóligi aýyldyq mektepterdiń túlegi ekendigin eskeretin bolsaq, atalǵan bilim uıalary jańa bilim berý baǵdarlamalaryn tolyqqandy meńgerip, jete tanysqany óte mańyzdy.
Sondaı-aq Almaty qalasynda birqatar mektep muǵalimderi men oqýshylary atalǵan joba týraly ózindik pikirlerin aıtyp, oqýshylardyń ǵylymǵa degen erekshe qyzyǵýshylyǵyn týdyratynyn tilge tıek etti.
Aıta keteıik, Halyqaralyq Bilim kúnine arnalǵan jıyndy M. Áýezov atyndaǵy OQMÝ, I. Jansúgirov atyndaǵy Jetisý memlekettik ýnıversıteti, Pavlodar memlekettik pedagogıkalyq ýnıversıteti, H. Dosmuhamedov atyndaǵy Atyraý memlekettik ýnıversıteti, Qostanaı memlekettik pedagogıkalyq ýnıversıteti jáne Sh. Ýálıhanov atyndaǵy Kókshetaý memlekettik ýnıversıtetiniń professor-oqytýshylary onlaın rejıminde tamashalady.
Jandar ASAN