О́tken jyly Shymkent qalalyq jumyspen qamtý jáne áleýmettik qorǵaý basqarmasynyń AHAT bóliminde 32464 sábı tirkelgen. Onyń 60 paıyzy uldar bolsa, 40 paıyzy qyzdardy quraǵan. Tipti, jańa týǵan nárestelerge qandaı esimderdiń eń kóp qoıylatyndyǵy da belgili boldy.
Sala mamandarynyń málimeti boıynsha qutpan jyly dúnıe esigin ashqan sábılerge jıi qoıylǵan esimder – Aısultan men Medına eken.
Máselen, ótken jyly dúnıege kelgen ul balalarǵa Aısultan, Nursultan, Dinmuhammed, Álıhan esimderi qoıylǵan bolsa, qyz balalarǵa Medına, Raıana, Káýsar, Aızere, Aısulý esimderi jıi qoıylǵan.
Esterińizge salar bolsaq, 2018 jyly Shymkent halqynyń sany mıllıonǵa jetip, Elbasynyń Jarlyǵymen Shymkent elimizdegi respýblıkalyq mańyzy bar resmı úshinshi megapolıske aınalǵan bolatyn. Al, 17 mamyrda dúnıege kelgen Aısulý Elamanova esimdi búldirshin mıllıondy shahardyń mıllıonynshy turǵyny bolyp tirkelgen edi.
Nurshat TО́KEN,
«Egemen Qazaqstan»