Búgin Úkimet úıinde Qazaqstan Respýblıkasynyń Premer-Mınıstri Baqytjan Saǵyntaev Qazaqstan menedjment, ekonomıka jáne boljamdaý ınstıtýtynyń prezıdenti Chan Ian Bengpen kezdesý ótkizdi. Bul týraly Premer-Mınıstrdiń baspasóz qyzmeti habarlady.
Kezdesý barysynda joǵary oqý oryndaryndaǵy zamanaýı bilim berý modeline, JOO damytýdyń jańa ádisteri men tásilderine, sondaı-aq joǵary bilim berýdiń halyqaralyq standarttaryna qatysty birqatar máseleler talqylandy.
KIMEP — otandyq joǵary bilim júıesiniń úzdigi, tarıhy tereń ári eń iri ýnıversıtetterdiń biri. JOO negizi 1992 jylǵy 14 qańtarda Almaty qalasynda quryldy. Ortalyq Azııada birinshi bolyp bakalavrıat jáne magıstratýra baǵdarlamalary boıynsha Soltústik Amerıkalyq oqytýdyń nesıelik tehnologııasyn engizdi. Ýnıversıtettiń barlyq akademııalyq baǵdarlamalary aǵylshyn tilinde oqytylady. KIMEP ýnıversıtetiniń baǵdarlamasy bedeldi eýropalyq jáne amerıkalyq akkredıtasııalyq agenttikterden halyqaralyq akkredıtasııa aldy.