О́ńirde 2013 jyly engizilgen kanadalyq joba gıpertonııa, qant dıabeti men júrek aýrýlaryn saýyqtyrýǵa arnalǵan.
Bes jylǵa sozylǵan baǵdarlamaǵa ekijúzge jýyq soltústikqazaqstandyq qatysyp, keselderine shıpa tapty. Baǵdarlamanyń qaterli sozylmaly aýrýǵa shaldyqqandardyń dertin asqyndyrmaı jaqsartýǵa baǵyttalǵan tıimdiligi anyq baıqalǵannan keıin onyń ıgiligin kórýshilerdiń qatary artyp keledi. Júrek aýrýlary, qant dıabeti men gıpertonııadan zardap shegetinder úshin zor paıdasyn №3 qalalyq emhananyń salaýatty ómir salty kabınetiniń meıirbıkesi Qarlyǵash Ábdenova bylaı áńgimeleıdi:– Gıpertonııaǵa shaldyqqana naýqastarmen jumys isteýdiń tirek pýnkti №3 qalalyq emhanada ornalasqan. Quramynda jalpy tájirıbelik dáriger, kardıolog, psıholog, áleýmettik qyzmetker men salaýatty ómir salty mamandary bar top árbir adamǵa qatysty jeke jospar quryp, onyń oryndalýyn baqylaýda ustaıdy. Nátıjeleri aıtarlyqtaı. Aýrýlardy basqarý baǵdarlamasyna qatysqan 150 adamnyń barlyǵy qazir ózderin qalypty sezinedi. Basym kópshiligi artyq salmaqtan arylyp, tamaqtaný men qımyl-qozǵalysyn qalypqa keltirdi. Kókónisti kúndelikti tutynýmen qatar taza aýada serýendeýdi , sportpen shuǵyldanýdy ómirlik daǵdyǵa aınaldyrdy. Eń bastysy, qan qysymyn qalypta ustaý múmkindigi týdy.
Lıýbov Nedostoeva alǵash dárigerdiń qabyldaýyna kelgende qan qysymy óte joǵary bolypty. Sondyqtan tyń jobaǵa qatysýǵa birden kelisipti.
«Qan qysymym turaqtanǵannan keıin mindetti túrde dıeta ustaýǵa, sportpen aınalysýǵa kóshtim. Basseınde sýǵa júzetin boldym. Jaz aılarynda baý-baqshada eńbek etip, taza aýada tynyǵamyn. Bir jyldan soń salmaǵym 15 kelige kemip, keselden birjola aıyqtym», deıdi ol.
О́mir ESQALI,
«Egemen Qazaqstan».
Soltústik Qazaqstan oblysy.