Batys Qazaqstan oblysynda memlekettik qyzmetshi quqyqtarynyń saqtalýy, sonyń ishinde negizsiz ústeme jumysqa tartylmaýy qatań qadaǵalanady. Bul jóninde Qazaqstan Respýblıkasy memlekettik qyzmet isteri jáne sybaılas jemqorlyqqa qarsy is-qımyl Agenttigi BQO boıynsha departamentiniń Memlekettik qyzmet salasyn baqylaý basqarmasynyń basshysy Jaqsat Muratov málimdedi.
Memlekettik qyzmetshiler jumys ýaqytynan tys isteletin jumysqa, demalys jáne mereke kúnderindegi jumysqa Qazaqstan Respýblıkasynyń eńbek zańnamasynda kózdelgen tártippen ǵana tartylýy tıis.
- О́tken jyldyń qazan aıynda Agenttik tapsyrmasy negizinde oblys aýmaǵyndaǵy memlekettik organdar arasynda júrgizilgen saýalnama nátıjesi boıynsha - 2112 memlekettik qyzmetshiniń 513-i, ıaǵnı 24,3%-y jumys ýaqyty aıaqtalǵannan keıin de jumys ornynda kidiretinin kórsetti, - deıdi Jaqsat Muratuly.
Búginde Departament memlekettik qyzmetshilerdiń jumystan tys ýaqytta jumys ornynda negizsiz qalý faktilerin anyqtaý jáne olardy boldyrmaý boıynsha qoǵamdyq uıymdardyń qatysýlarymen birlesken is-sharalar ótkizýde. Shara barysynda Departament qyzmetkerleri 117 memlekettik organǵa baryp tekserip, nátıjesinde memlekettik qyzmetshiniń jumys ýaqytynan keıin jumys ornynda otyrǵan 22 faktini anyqtaǵan. Olardyń 16-sy óz laýazymdyq mindetin memlekettik organ basshysynyń ústeme jumysqa tartý týraly tıisti buıryǵyna sáıkes atqarǵan eken. Al 6 oqıǵada ústeme jumystarǵa tartý týraly jumys berýshiniń aktisi men jumyskerdiń jazbasha kelisimi bolmaǵan. Aqysyz artyq qyzmet etip otyrǵan 5 qyzmetker - Oral qalasy turǵyn úı-kommýnaldyq sharýashylyǵy jáne turǵyn úı ınspeksııasy bólimi mamandary bolsa, 1-i – Batys Qazaqstan oblystyq orman sharýashylyǵy jáne janýarlar dúnıesi aýmaqtyq ınspeksııasynan eken.
Osy tekseris negizinde kináli laýazymdy tulǵalar tártiptik jazaǵa tartyldy.
Sondaı-aq, memlekettik qyzmetshilerdiń jumysqa kelý, jumystan ketý ýaqyty da qatań baqylaýda. Departament jergilikti atqarýshy jáne aýmaqtyq memlekettik organdardyń memlekettik organ ǵımaratyna ornatylǵan kirip-shyǵýdy baqylaıtyn SKÝD júıesinen alynǵan derekterdi zerdelep, ótken jyldyń jeltoqsan aıynda BQO qazynashylyq departamentiniń, BQO statıstıka departamentiniń, BQO aýylsharýashylyǵy basqarmasynyń keıbir memlekettik ákimshilik qyzmetshileri jumys ýaqyty aıaqtalǵannan keıin jumys oryndarynda bolǵany belgili boldy. Osyǵan oraı memlekettik qyzmetshilerdiń quqyqtaryn qorǵaý maqsatynda Qazaqstan Respýblıkasynyń Eńbek kodeksiniń 77 jáne 78 baptarynyń saqtalýy máselesi boıynsha sáıkesinshe tekserý uıymdastyrý týraly Batys Qazaqstan oblysynyń eńbek ınspeksııasyna usynys joldanyp, qazir atalǵan memlekettik organdardy tekserý júrgizilýde.
Dál osyndaı tekserister budan buryn da uıymdastyrylyp, Qazaqstan Respýblıkasy Eńbek kodeksiniń ústeme jumystarǵa aqy tóleý talaptaryn saqtalmaǵany úshin Aqjaıyq aýdany ákimi apparatynyń jáne Aqjaıyq aýdanynyń turǵyn úı kommýnaldyq sharýashylyǵy, jolaýshylar kóligi jáne avtomobıl joldary bóliminiń eki laýazymdyq tulǵasyna 30 AEK kóleminde aıyppul salynǵan edi.
- Memlekettik qyzmetshilerdiń jumys ýaqytynan keıin jumys ornynda negizsiz kidirýin boldyrmaý maqsatynda Batys Qazaqstan oblysynyń memlekettik organdarynda memlekettik qyzmetshilerdiń jumys kompıýterine jumys ýaqyty aıaqtalǵan soń avtomatty túrde sónip qalatyn júıe ornatyp jatyrmyz, - deıdi Jaqsat Muratuly.
Búginde óńirde oblystyq deńgeıdegi 25 jergilikti atqarýshy memlekettik organnyń 22-sinde osy baǵdarlama iske qosylyp, 88%-dy quraǵan. Al Oral qalalyq, aýdandyq jáne selolyq deńgeıdegi 306 jergilikti atqarýshy memlekettik organda bul kórsetkish 43%-dy qurap otyr. Iаǵnı tek 133 bul júıege qosylǵan.
Qazbek QUTTYMURATULY,
«Egemen Qazaqstan»