Semeıde «Egemen Qazaqstan» gazetiniń ardageri, Qazaqstannyń «Qurmetti jýrnalısi» Dáýlet Seısenulynyń 70 jas mereıtoıy atalyp ótildi.
«Egemen Qazaqstan» gazetiniń 100 jyldyq mereıtoıy aıasynda basylymda uzaq jyl Semeı óńiri boıynsha tilshi bop eńbek etken, jazýshy-dramatýrg, jýrnalıst, Elbasynyń «Altyn barys» tós belgisiniń ıegeri Dáýlet Seısenulynyń 70 jasqa tolý mereıtoıy atalyp ótildi. Abaı atyndaǵy drama teatr sahnasynda eń aldymen Dáýlet Seısenulynyń «Jánibek án salady...» atty drama rekvıemi qoıyldy. Qoıylymnyń rejısseri Erbol Jýasbek.
Kesh barysynda Dáýlet Seısenuly Semeı qalasynyń jáne Abaı aýdanynyń qurmetti azamaty, qalamgerdiń «Egemen Qazaqstan» gazetiniń turaqty aksııasyna aınalǵan «Ulylyqqa taǵzym» atty jaıaý joryq ekspedısııasynyń múshesi bolǵandyǵy jáne bul joryqtyń atalmysh gazettiń ardageri Mamadııar Jaqyptyń bastamasymen Abaıdyń 150 jyldyǵynda bastalǵandyǵy týraly da aıtyldy.
Semeılik aıtysker aqyn Manarbek Satybaldın ustazy Dáýlet Seısenulyna arnap jyrdan shashý shashty. Kelesi kezekte Semeı qalasynyń ákimi Ermak Sálimov sahnaǵa kóterilip, Prezıdent ákimshiliginiń, oblys ákimi Danıal Ahmetovtyń quttyqtaýlaryn oqyp, arnaıy syı-syıapat jasady. Sondaı-aq, QR Mádenıet jáne sport mınıstrliginen kelgen quttyqtaýlar da oqyldy. Sahna tórine 100 jyldyq tarıhy bar «Egemen Qazaqstan» respýblıkalyq gazeti aksıonerlik qoǵamynyń Basqarma tóraǵasy Darhan Qydyráli shyǵyp, Dáýlet Seısenulyna ujym atynan jyly lebizin bildirip, qazaqy dástúrmen shapan japty. Arnaıy marapattap, «Egemen Qazaqstan» basylymy ardagerlerin osylaı ulyqtap, qurmettep otyrýdy dástúr retinde jalǵastyra beretindikterin tilge tıek etti. Budan keıin Jazýshylar Odaǵy tóraǵasynyń orynbasary, aqyn Baýyrjan Jaqyp, akademık-jazýshy Ǵarıfolla Esim, memlekettik syılyqtyń laýreaty, aqyn Nesipbek Aıtuly, jazýshy Tursyn Jurtbaı, ónertaný professory Kenjeǵalı Myrjyqbaev, «Egemen Qazaqstan» gazetiniń ardager-jýrnalısi Ońdasyn Elýbaılar da sahna tórine shyǵyp, kesh ıesine ıgi tilekterin, iltıpattaryn bildirdi.
Sondaı-aq Dáýlet Seısenulynyń baspadan jańa shyqqan «Shyńǵystaýdyń dara da dańqty perzentteri» atty kitabynyń tusaýkeseri ótti. Kitap jaıly etnograf-jazýshy Moldabek Janbolatuly arnaıy tanystyrdy. Moldabek Janbolatuly kitap avtoryn 70 jasymen jáne ol eńbek etken «Egemen Qazaqstan» gazetin 100 jyldyǵymen quttyqtaı kele bylaı dedi:
- Dáýlet inimizdiń 50,60,70 jastary ylǵı «Egemen Qazaqstannyń» mereıtoıymen tuspa-tus kelip, Semeıde atalyp ótiledi. Bunyń bir ózindik syry bar. Sebebi «Egemen Qazaqstan» gazetiniń eń alǵashqy sany osy Semeıde basylyp shyqqan. 100 jyl ishinde bul gazet talaı syndarly saıasattan, talaı soqpaqtan ótti. Basylymda Sherhan Murtaza, Ábish Kekilbaev, Saýytbek Ábdirahmanov syndy tulǵalar redaktor boldy. Bul gazet bir kezderi alashordashylardyń, odan soń partııanyń, keıin Táýelsiz Qazaqstannyń tól basylymy boldy. Qandaı ýaqyt bolsa da, bul gazet halqyna etene jaqyn boldy. Búginde Darhan baýyrymyz basqaratyn ujymnyń bedeli bıik bolsyn degimiz keledi. Toı toıǵa ulassyn! Dáýlettiń de, ol eńbek etken «Egemen Qazaqstannyń» da mereıleri ústem bolsyn.
Raýshan Nuǵmanbek,
«Egemen Qazaqstan»
Semeı