Kezdesý barysynda Natalıa Godýnova Memleket basshysyna Respýblıkalyq bıýdjettiń atqarylýyn baqylaý jónindegi Esep komıtetiniń 2018 jyly atqarǵan jumystarynyń qorytyndysy týraly baıandady. Bul týraly Aqordanyń baspasóz qyzmeti habarlady.
Nursultan Nazarbaev Esep komıtetiniń tarapynan bıýdjet qarajatyna únemi baqylaý júrgizilip, onyń tıimdi ıgerilýine muqııat taldaý jasaýdyń mańyzdylyǵyn atap ótti.
– Esep komıtetiniń negizgi mindeti – memlekettik bıýdjettiń tıimdi jumsalýyn qadaǵalaý. Baqylaý isinen aýdıtke kóshýge baılanysty sizderdiń aldaryńyzda jańa mindetter tur, – dedi Elbasy.
Esep komıtetiniń tóraıymy respýblıkalyq bıýdjettiń tıimdi jumsalýyna aýdıt júrgizý barysy jáne osy saladaǵy álemdik tájirıbeni zertteý nátıjeleri jóninde málimdedi.
– Biz tıimdilik aýdıtine kóshý jumystaryn jalǵastyra beremiz. Byltyr jalpy somasy 430 mıllıard teńge kóleminde tártip buzýshylyq jasalǵany anyqtaldy. Eger býhgalterlik esepsiz naqty qarjylyq tártip buzýshylyqty eseptesek, onyń mólsheri 16 mıllıard teńgeni qurap otyr. Bul kórsetkish 2017 jyly 70 mıllıard teńge bolǵan edi. Osylaısha, qarjylyq tártiptiń jaqsara túskeni baıqalady, – dedi N.Godýnova.
Esep komıtetiniń tóraıymy memlekettik jáne salalyq baǵdarlamalar bıýdjetiniń tıimdiligine júrgizilgen baǵalaý nátıjeleri jóninde málimet berdi. Sondaı-aq, jalpy ekonomıkalyq jáne qarjylyq josparlaý sapasyn arttyrý úshin Úkimetpen birlesip qabyldaǵan sharalar týraly baıandady.
Kezdesý sońynda Memleket basshysy Esep komıtetine «Nur Otan» partııasynyń XVIII sezinde aıtylǵan áleýmettik baǵdarlamalar men bastamalardyń júzege asyrylýyna tıisti baqylaý jasaýdy tapsyrdy.