Memleket basshysy «Nur Otan» partııasynyń XVIII sezinde 1 shildeden bastap jalaqysy tómen bıýdjettik sala qyzmetkerleriniń aılyǵyn 30%-ke kóterýdi tapsyrdy. Osyǵan baılanysty Úkimet otyrysynda Bilim jáne ǵylym mınıstri Kúlásh Shámshıdınova Prezıdent tapsyrmasy aıasynda qaı qyzmetkerlerdiń jalaqysy kóteriletinin aıtty.
Vedomstvo bilim berý salasyndaǵy jalaqysy tómen qyzmetkerlerdiń tabysyn ulǵaıtý, orta bilimde reformany naqty túrde iske asyrý, sondaı-aq ilgeri joǵary oqý oryndary men zamanaýı kollejderdi anyqtaýǵa qatysty birqatar mindetti oryndaýy qajet.
QR BǴM derekteri boıynsha, pedagog qyzmetkerlerdiń jalaqysyn arttyrý júıeli túrde júrgizilip jatyr jáne kezeń-kezeńimen sheshimin tabýda. 2018 jyly Memleket basshysynyń tapsyrmasymen attestattaýdyń jańa júıesi negizinde kategorııasyn rastaǵan jáne jańa mazmundaǵy bilim berý baǵdarlamalarymen jumys isteıtin ustazdardyń jalaqysy 30-50%-ǵa ósti.
K. Shámshıdınovanyń aıtýynsha, bilim berý salasyndaǵy jalaqysy tómen qyzmetkerlerdiń eńbek aqysyn ulǵaıtý 30%-ǵa deıin saralanǵan túrde júzege asatyn bolady.
«Bilim berý salasynda 500 myń adamnyń jalaqysy ósedi. Olardyń qatarynda mektepke deıingi uıymdar men ınternattardyń tárbıeshileri men olardyń kómekshileri, ádiskerler, áleýmettik pedagogtar, balabaqshalar men kolledjderdiń psıhologtary, qosymsha bilim berý uıymdarynyń qyzmetkerleri, kitaphanashylar, tálimgerler, býhgalterler, is júrgizýshiler, jınap tazalaýshylar, aýla tazartýshylar, kúzetshiler, pesh jaǵýshylar, santehnıkter men elektrıkter jáne t.b. bar», — dedi bilim jáne ǵylym mınıstri.
Qazirgi ýaqytta Bilim jáne ǵylym mınıstrligi Eńbek jáne halyqty áleýmettik qorǵaý mınıstrligimen birlesip, qyzmetkerlerdiń sanattaryn jáne jalaqysyn arttyrý kólemin naqty anyqtaý jumystaryn júrgizip jatyr.
Sonymen qatar, bilim berý sapasyn arttyrý maqsatynda, 2019–2021 jyldar aralyǵynda jańartylǵan mazmun boıynsha 144 myń muǵalim, 82 myń synyp jetekshileri men psıhologtar, 15,5 kolledj mamandary men 2,4 myń JOO oqytýshylary qaıta daıarlaý kýrstarynan ótedi. Qazirgi tańda tildik kýrstardan ótken 11 423 jaratylystaný pánderiniń muǵalimderi 764 mektepte sabaq berip júr.
«2020 jyldan bastap atalǵan kýrstarǵa qarastyrylǵan qarjy joǵary oqý oryndarynda aǵylshyn tilinde sabaq beretin muǵalimder daıyndaýǵa jumsalatyn bolady. Bul oraıda JOO-lardyń túlekteriniń jumysqa ornalasý deńgeıi eskeriledi. Osy jyldan bastap mektepterge til meńgergen JOO túlekteri kele bastaıdy», — dedi bilim jáne ǵylym mınıstri.
Sonymen qatar, mektep qurylysy men kúrdeli jóndeýden ótkizýdi qarjylandyrýdyń jańa ádistemesi engiziledi. Qarjylandyrý kólemi oqýshylar kontıngentine baılanysty anyqtalady. Qaı jerde mektep salý jergilikti atqarýshy organdardyń quzyretinde bolady. Barlyq deńgeılerdegi bilim berý baǵdarlamalary zaman talabyna saı ózektendirilip otyrady.
Budan ózge, 20 ilgeri joǵary oqý oryndary men 180 zamanaýı kollejderdi anyqtalady. Bul úshin Eńbek jáne halyqty áleýmettik qorǵaý mınıstrligimen birlesip 100 basym mamandyq pen bilim berý uıymdaryn anyqtaýdyń negizgi krıterııleri belgilenedi.
«Jurtshylyqpen jáne jumys berýshilermen yntymaqtasa otyryp, ýnıversıtetter men kolledjder tizimi anyqtalyp, olardyń bilim baǵdarlamalary ekonomıkanyń talaptaryna saı ózektendiriledi. Sondaı-aq, kollejderdiń oqytýshylary men óndiristik oqytý sheberleriniń biliktiligin arttyrý qarastyrylady. Oqý prosesine sheteldik mamandar tartylady», — dep málimdedi K. Shámshıdınova.
Budan ózge, 100 basym mamandyqtarǵa sáıkes qajetti jabdyqtar toptamasy belgilenedi.