T.Júrgenov atyndaǵy ulttyq О́ner akademııasyndaǵy fakýltetter qatary «Ulttyq óner» dep atalatyn jańa fakýltetpen tolyqty. Fakýltet Elbasy N.Á.Nazarbaevtyń «Uly dalanyń jeti qyry» atty baǵdarlamalyq maqalasynyń aıasynda ulttyq mýzyka ónerin, qoldanbaly óner men qolónerdi damytý jáne dáripteý, oǵan qyzmet etetin jas mamandardy daıarlaý maqsatynda quryldy. Fakýltet quramynda «Dástúrli mýzyka óneri» jáne «Sándik-qoldanbaly óner» kafedralary bar.
Rýhanı qundylyqtyń túpki máni – ulttyq óner. Ár halyqtyń rýhanı álemi eń aldymen onyń dástúrli ónerinen kórinis tabady. Qazaq eliniń mádenıetin, rýhanı baılyǵyn álemge tanytýda ulttyq dástúrli ónerdiń alar orny, atqarar qyzmeti erekshe ekeni sózsiz. Búginde «Dástúrli mýzyka óneri» men «Sándik-qoldanbaly óner» kafedralarynyń túlekteri, el mádenıetin álemge áıgilep, halyqaralyq, respýblıkalyq óner dodalarynda top jaryp júr. Stýdentterge respýblıkanyń maqtanyshyna aınalǵan R.Stamǵazıev, P.Momynov, N.Janpeıisov, M.Abýǵazy, T.Muqyshev, S.Bapanova, R.Bazarbaeva, E.Daýbaev syndy kásibı mamandar bastaǵan, tájirıbeli oqytýshylar bilim beredi.
QazUО́A rektory, Qazaqstannyń eńbek sińirgen qaıratkeri Ashat Maemırovtyń aıtýynsha, fakýltetti ashýdaǵy maqsat – joǵary bilim sapasyn qamtamasyz etý, stýdentterdiń ǵylymı-teorııalyq daıyndyǵy men oryndaýshylyq sheberligin arttyrý, sondaı-aq, oqý-tárbıe úderisin tıimdi ádis-tásildermen basqarý, ulttyq ónerdi oqytýdyń zamanaýı úlgilerin paıdalaný. Qazaqstannyń mádenıet mekemeleri men bilim berý uıymdaryn halyqaralyq básekege qabiletti, joǵary bilikti mamandarmen qamtamasyz etý.
Ulttyq ónerdiń búgingi jáne keler urpaqqa túpnusqasy burmalanbaı, tabıǵı turǵyda bizge jetken muralardyń saqtalýyna jáne nasıhattalýyna yqpal etý barysynda fakýltet ujymy úlken jumystardy josparlap, iske asyrmaq nıette.
«Ulttyq óner» fakýltetiniń dekany bolyp Oljas Qanatuly Ibraev taǵaıyndaldy.
Aıgúl AHANBAIQYZY
«Egemen Qazaqstan»
ALMATY