«Uly dala jaýharlary» atty áleýmettik joba aıasynda oblystyq beıneleý óneri mýzeıinde tuńǵysh ret kórý qabileti nashar adamdarǵa arnalǵan kórme uıymdastyryldy.
Sharaǵa elimizge tanymal sýretshiler týyndylarynyń barelef-kóshirmeleri qoıyldy. Al 14 kartınany Oqýshylar saraıyndaǵy kórkemsýret mektebiniń tárbıelenýshileri salyp ákeldi.
Biregeı kórmeniń ereksheligi sol, kartınalardyń eki birdeı nusqasy usynylǵan. Birinshisi – sýretshiniń ózi salǵan túpnusqa bolsa, onyń astyna zaǵıp jandar úshin arnaıy jasalǵan týyndylar jaıǵastyrylǵan. Osylaısha, kózi nashar kóretin jerlesterimiz Ábilhan Qasteev, Áýbákir Ysmaıylov, Sahı Romanov syndy belgili óner ıeleriniń jumystaryn tamashalaı aldy.
«Byltyr Almaty qalasyna issaparmen barǵan kezde Á.Qasteev atyndaǵy mýzeıde osyndaı týyndylardy kórgen edik. Sodan jergilikti jerde nege qolǵa almasqa degen oı týdy. Oqýshylar saraıyndaǵy kórkemsýret mektebi usynysymyzdy birden qabyl aldy. Joǵary deńgeıde oryndalǵan jumystar birden nazar aýdartady», deıdi beıneleý óneri mýzeıiniń qyzmetkeri Jibek Júzenova.
16 jastaǵy Ýlıana Popýlova Reseıdiń halyq sýretshisi Baqı Ýrmancheniń tabıǵat kórinisterine arnalǵan týyndysyn aınytpaı keltirý úshin bir aı ýaqytyn jumsapty. Aǵashty beıneleý úshin butaqtardy qoldanypty. Boıjetken zaǵıp jandarǵa keremet kartınany seziný múmkindigin syılaǵanyna óte qýanyshty. Aldaǵy ýaqytta da barelefti-kóshirmeler jasaýmen aınalyspaq
Jas sýretshiler árbir peızaj, portret pen natıýrmorttaǵy detaldardy da erekshe dáldikpen jetkize bilgen.Qyp-qyzyl alma deısiń be, álde órise jaıylyp júrgen tórt túlik mal ma...bárin qolmen ustap, aıqyn sezinýge bolady. Kartınany kóz aldyna elestetýge Braıl shrıfimen jazylǵan anyqtamalyq aqparat kóp septigin tıgizedi.
«Biz buryndary mýzeıdegi músinderdiń kórmesine ǵana keletinbiz.Endi sýretshilerdiń týyndylaryn tamashalaý múmkindigine ıe bolyp otyrmyz. Balalar men murajaı qyzmetkerlerine aıtar alǵysym sheksiz», deıdi zaǵıp jandar.
О́mir ESQALI,
«Egemen Qazaqstan»
Soltústik Qazaqstan oblysy