Aqmola oblysynyń Selınograd aýdanynda aýdandyq sot ǵımaraty aldynda qazaq halqynyń tóbe bılerine arnalǵan «Úsh bı» estelik eskertkishiniń jáne Aqmol aýylynda «Jeti jarǵy» kóshesiniń saltanatty ashylý rásimi ótti.
Ashylý saltanatyna aýdan turǵyndary, sot júıesiniń, ákimdiktiń, aýdandyq maslıhattyń ókilderi, quqyq qorǵaý organdarynyń, prokýratýra, jergilikti memlekettik organdardyń, bıznes qurylymdarynyń basshylary, eńbek jáne sot júıesiniń ardagerleri qatysty. Atalǵan is-shara aýdan jáne oblys úshin mańyzdy oqıǵa boldy.
Saltanatty is-sharada Aqmola oblystyq sotynyń tóraǵasy Dosjan Ámirov, Qazaqstan Respýblıkasy Joǵarǵy Soty janyndaǵy sottardyń qyzmetin qamtamasyz etý departamentiniń aqparattyq qamtamasyz etý bólimi meńgerýshisiniń orynbasary Nurgúl Qaraǵoıshına, «Selınogradskoe» kredıttik seriktestigi» JShS-niń basqarma tóraǵasy, Qoǵamdyq keńes tóraǵasy Saǵdat Áshebekov, aýdan ákiminiń orynbasary Alma Aıtqojınova jáne Selınograd aýdandyq sotynyń tóraǵasy Tólegen Turǵambaev quttyqtaý sózderimen sóz sóıledi.
Aqmola oblystyq sotynyń tóraǵasy Dosjan Ámirov óz sózinde úsh júzdiń bas bıleri el tutastyǵyna, halyqtyń birligine aıryqsha yqpal etkendigin atap ótti.
–Tóle, Qazybek jáne Áıteke bılerine arnalǵan estelik eskertkishteri osy eldi mekenge keletin jurtshylyqtyń kózin qýantatyn, súıikti orynǵa aınalady. Qazaq halqynyń birigýine jáne memlekettiń tutastyǵyn saqtaýǵa kóp eńbek etken qaıratkerlerdi óskeleń urpaq biletin bolady. «Úsh bı» eskertkishi danalyqty jáne turaqtylyqty beınelep, maqtanysh, kúsh pen erlikti sondaı-aq, birlikpen myqty memleketti jáne ádil qoǵamdy aıshyqtap turady,– dedi Dosjan Ámirov.
Aýdandaǵy ekinshi mańyzdy oqıǵa – ol «Jeti jarǵy» kóshesiniń ashylýy. Aqmol aýylyndaǵy «Jeti jarǵy» kóshesi 15-19 ǵasyrlardaǵy handyq dáýirdegi qazaq quqyǵynyń tarıhynda bolǵan «Jeti jarǵy» zańnamalyq eskertkishiniń atymen qoıylǵan. Atalǵan zań Táýke han tusynda jeti bólimnen qurylyp, memlekette quqyqtyq qatynasty rettegen birinshi Ata zań bolyp tabylady.
Oblystyq sottyń tóraǵasy, sýdıalar qaýymdastyǵy men jergilikti atqarýshy organdardyń qazaq halqynyń bıleriniń esimderimen aýyl jáne kóshe ataýlaryn ózgertý boıynsha talpynystaryn atap ótti. Búgingi tańda oblysymyzda 13 kóshe jáne 1 kentke bılerdiń esimderi berilip, osy arqyly qazaq halqynyń tarıhy jańǵyrtyldy. Atalǵan jumys Qazaqstan Respýblıkasy Joǵarǵy Sotynyń basshylyǵymen Elbasynyń «Bolashaqqa baǵdar: rýhanı jańǵyrý» jáne «Uly dalanyń jeti qyry» atty baǵdarlamalyq maqalalarynyń negizgi qaǵıdalaryn iske asyrý maqsatynda júrgizilýde.
Qazaqstan Respýblıkasy Joǵarǵy Soty janyndaǵy sottardyń qyzmetin qamtamasyz etý boıynsha departamentiniń ókili Núrgúl Qaraǵoıshına is-sharaǵa qatysýshylarǵa Qazaqstan Respýblıkasy Joǵarǵy Sotynyń tóraǵasy Jaqyp Asanovtyń quttyqtaýyn jetkizdi. N.Qaraǵoıshına «Rýhanı jańǵyrý» baǵdarlamasyn iske asyrý aıasynda úsh bıge arnalǵan eskertkishtiń ashylýy men «Jeti jarǵy» kóshesiniń qaıta atalýynyń mańyzdylyǵyna toqtaldy.
Baıqal BAIÁDIL,
«Egemen Qazaqstan»
Aqmola oblysy,
Selınograd aýdany.