«Astana Opera» teatrynyń solısi, «Qurmet» ordeniniń kavaleri, kóptegen halyqaralyq baıqaýlardyń laýreaty Aızada Kaponova Qazaqstan Respýblıkasynyń Tuńǵysh Prezıdenti – Elbasy Qory syılyǵynyń «Mýzykalyq óner» atalymy boıynsha laýreaty atandy.
Ánshi soprano Aızada Kaponova týǵan sahnasynda birqatar qaıtalanbas beınelerdi jasap qana qoımaı, sondaı-aq Qazaqstan Respýblıkasynyń Prezıdenti N.Á.Nazarbaevtyń «Rýhanı jańǵyrý» baǵdarlamasy aıasynda álemniń eń mártebeli sahnalarynda gastroldik saparmen birneshe ret óner kórsetken. Qazaqstandyq mádenıet qaıratkerleriniń kóptegen jetistikteriniń arqasynda otandyq óner halyqaralyq arenada baǵalanyp, bedelge ıe bolýda.
- Tuńǵysh Prezıdent Qory syılyǵynyń laýreaty ataný – men úshin úlken mártebe ári qýanysh. Ártisterdiń eren eńbegi men shyǵarmashylyǵyn baǵalaǵany úshin Elbasy Qoryna alǵysym sheksiz. Jastar jyly aıasynda kóptegen jas adamdardyń osynaý syılyqty alǵany erekshe mańyzdy dep oılaımyn, sebebi ol bizge ósip-órkendep, odan ári damýymyzǵa múmkindik beredi. Otanymyzdy tanystyryp, álemniń úzdik sahnalarynda óner kórsetý ári Qazaqstannyń damýyna óz úlesimizdi qosa otyryp, Elbasymyz Nursultan Ábishuly Nazarbaevtyń orasan zor josparlaryn iske asyrý múmkindigimizdiń baryn maqtan tutamyz, - dep atap ótti Aızada Kaponova.
Eske salar bolsaq, ánshi Qazaq ulttyq mýzyka akademııasyn «Vokal óneri» mamandyǵy boıynsha tamamdaǵan (professor, Qazaqstannyń eńbek sińirgen ártisi Q.N.Omarbaev synyby, 2008). Onyń jeńisteriniń arasynda – «Shabyt» halyqaralyq shyǵarmashyl jastar baıqaý-festıvaliniń II syılyǵy (Astana, 2007); Halyqaralyq vokalıster baıqaýy (Almaty, 2013) men Dj.Rossını atyndaǵy XV halyqaralyq baıqaýdyń (Pezaro q., Italııa, 2018) I júldeleri, N.Tilendıev atyndaǵy Halyqaralyq baıqaý-festıvaliniń Bas júldesi (Astana, 2015) bar. Vokalıstiń repertýarynda M.Tólabevtyń «Birjan – Sara», E.Brýsılovskııdiń «Qyz Jibek», A.Jubanov pen L.Hamıdıdiń «Abaı», Dj.Verdıdiń «Travıata» jáne «Rıgoletto», G.Donısettıdiń «Lıýchııa dı Lammermýr», J.Offenbahtyń «Gofman ertegileri», V.A.Mosarttyń «Sıqyrly fleıta» jáne t.b. opera jaýharlarynan basty partııalar bar.
Ǵylym, mádenıet jáne óner salasyndaǵy syılyq 2008 jyly taǵaıyndalǵanyn atap ótken jón. Qordyń eń qurmetti marapattarynyń biri jas qazaqstandyq daryn ıelerine olardyń ózindik shyǵarmashylyq jobalary, ǵylymı zertteýleri úshin beriledi. Syılyq laýreattarynyń qatarynda – «Astana Opera» jetekshi solısteri, Qazaqstannyń eńbek sińirgen qaıratkerleri – Áıgerim Beketaeva, Súndet Baıǵojın, Jupar Ǵabdýllına, Saltanat Ahmetova, Medet Chotabaev, Meıir Baınesh, Talǵat Musabaev; teatr solısteri – Bıbigúl Januzaq (Qazaqstannyń eńbek sińirgen qaıratkeri), Bolat Esimhanov, Tatıana Vısınskaıa; opera trýppasynyń konsertmeısteri Gaýhar Tasbergenova jáne t.b. bar.