Qostanaıda eńbektegen baladan eńkeıgen kárige deıin shańǵy tebýge shyqty. Oblys ortalyǵyndaǵy shańǵy bazasynda «Shańǵy – densaýlyq-2019» shańǵy sporty jáne buqaralyq shańǵy tebý festıvali bastaldy. Festıvaldiń ashylý saltanatynda oblys ákiminiń orynbasary Marat Júndibaev jınalǵandardy shańǵy merekesimen quttyqtady.
«Qostanaıda shańǵy sporty keń óris alǵan. Ataqty Ivan Garanın, Olga Seleznevanyń jeńisteri Qostanaıdyń ataǵyn alystarǵa máshhúr etken edi. Jerlesimiz Aleksandr Kolıadın paralımpıadada chempıon atanyp, myqtylyq pen shynyǵýdyń, eńbektiń qudiretin taǵy bir dáleldedi. Bulardan basqa búginde jastarymyz da qysqy sportqa belsene qatysyp, oblys atyn shyǵaryp júr. Mysaly short-trekten jasóspirimder arasynda ótken álem chempıonatynda Alena Volkovıskaıa, Hadısha Baqtygereeva, Gleb Ishenkolar halyqaralyq sport sheberi normasyn oryndady. Al Ońtústik Sahalınde ótken tuńǵysh qysqy halyqaralyq «Azııa balalary» oıyndarynda shańǵy tebýge qatysqan Pashenko Valerııa, short-trekten Vadım Sadovnıkov altyn medaldi jeńip aldy. Osyndaı jetistikterdiń barlyǵy da jas kezinen shynyǵýdyń arqasynda múmkin bolady. Sondyqtan búgingideı buqaralyq sıpat alyp otyrǵan shańǵy merekesiniń mańyzy zor» dedi Marat Qonysbaıuly.
Shańǵy festıvaliniń aýyldyq, aýdandyq satylary on bes myńdaı adamdy qamtydy. Oblys ortalyǵynda bastalǵan festıvalde myń qaraly adam shańǵy joldaryna shyqty. Jalpy oblys óńirinde bes myńdaı adam shańǵy sportymen aınalysady. Festıvalge tek jastar ǵana emes, shańǵy áýesqoılary jáne kásiporyn men mekemeler qyzmetkerleri, stýdentter men oqýshylar da qatysty.
«Oblystyq qoǵamdyq densaýlyq saqtaý departamentinen búgingi festıvalge 17 qyzmetker qatysyp otyr. Olardyń barlyǵy da shańǵy sóresinen kórindi. Biz aldymen qysqy sporttyń densaýlyq kepiliniń biri ekenin kórsetkimiz keldi» deıdi osy departamenttiń dırektory Oral Bekmaǵambetov.
Festıval erteń jalǵasatyn bolady.
Názıra JÁRIMBET,
«Egemen Qazaqstan»
Qostanaı