Ál-Farabı atyndaǵy QazaqUÝ-niń fılosofııa jáne saıasattaný fakýltetiniń májilis zalynda professor Bátish Raqymhanqyzy Qazyhanovanyń 90 jyldyǵyna arnalǵan is-shara bolyp ótti.
Dóńgelek ústel jumysyna QR Prezıdenti Arhıvi dırektorynyń orynbasary Qaırat Álimǵazınov, Arhıv qyzmetkerleri Janar Sataeva, Álııa Súleımenova, Hamıt Begalaev, sondaı-aq uzaq jyl boıy qyzmet atqarǵan Qurmanǵazy atyndaǵy ulttyq konservatorııanyń, ózge de oqý oryndarynyń professor ǵalymdary, qoǵam qaıratkerleri, áriptesteri men týystary qatysty.
Dóńgelek ústel aıasynda «Qazaqstan Respýblıkasy Prezıdenti Arhıviniń qorqurýshylary: Bátish Qazyhanova (14 naýryz 1929 j. – 1 naýryz 2016 j.)» tarıhı-qujattyq kórmeniń elektrondyq nusqasy jáne QR Prezıdenti Arhıvi daıyndaǵan ál-Farabı atyndaǵy Qazaq ulttyq ýnıversıtetiniń «О́negeli ómir»: Bátish Qazyhanova» atty kitabynyń 171-shyǵarylymynyń tusaýkeseri bolyp ótti.
Is-shara maqsaty – Qazaqstan Respýblıkasy Prezıdenti Arhıviniń jeke tektik qorlarynyń qujattaryn kópshilikke jarııa etý, el tarıhynyń derekterin jeke qorlardyń quramyndaǵy qujattar arqyly nasıhattaý.
Kitaptyń lentasyn Qazaqstan Respýblıkasy Prezıdenti Arhıvi dırektorynyń orynbasary Q. Álimǵazınov, Qurmanǵazy atyndaǵy Qazaq ulttyq konservatorııasynyń professory T. Satybaldına, ál-Farabı atyndaǵy Qazaq ulttyq ýnıversıtetiniń professory T. Ǵabıtov qıdy.
Dóńgelek ústelge qatysýshylar B. Qazyhanovanyń adamgershilik parasaty, ǵylymı qarymy, qoǵamdyq-saıası qyzmeti jaıly esteliktermen bólisti. T. Ǵabıtov B. Qazyhanovaǵa arnalǵan kitaptyń tusaýkeser rásiminiń fılosofııa jáne saıasattaný fakýltetinde ótkizilýin rámizdi oqıǵa retinde atap ótti. «B.R.Qazyhanova Qazaqstandaǵy kásibı estetıka ǵylymynyń negizin salýshy, Orta Azııa men Qazaqstan Respýblıkalarynyń ishindegi alǵashqy ǵylym doktory» dep atap kórsetti. T. Satybaldına Qurmanǵazy atyndaǵy Qazaq ulttyq konservatorııasynda 30 jyldan astam ýaqyt birge qyzmet etken kezderin eske alyp, Bátish Raqymhanqyzynyń eki dáýirdiń urpaǵy ekenin, tolyqqandy qazaq áıeli, baqytty ana bolǵanyn aıtty. Fılosofııa ǵylymdarynyń doktory S. Nurmuratov QR Prezıdenti Arhıvindegi, jeke tulǵalardyń ómiri men qoǵamdyq qyzmeti jaıly jınaqtardy daıyndaý sııaqty jaqsy dástúrdiń saqtalǵanyna, tulǵataný salasyna qosylǵan jańa eńbekterge toqtaldy. B. Qazyhanovanyń áriptesteri, ǵylym doktorlary N. Báıtenova, J. Altaev, K. Begalınova, D. Raev, týystary B. Qazyhanova, K. Baıjanova, uly Erlen Jangeldın jáne taǵy basqa fılosof ǵalymdar ǵylymı ataqtardy berý jónindegi Dıssertasııalyq keńeste birge qyzmet atqarǵan kezderi týraly estelikterimen bólisip, onyń Qazaqstandaǵy fılosof mamandardy daıarlaýdaǵy úlesi, otbasylyq ómirdegi baýyrmaldylyǵy, qonaqjaı qasıeti jóninde áńgimeledi. Abylaıhan atyndaǵy Halyqaralyq qatynastar jáne álem tilderi ýnıversıtetiniń professory D.Raev respýblıkadaǵy joǵary oqý oryndarymen, ǵylymı zertteý ortalyqtarymen birlesip jyl saıyn B. Qazyhanova oqýlaryn, ónertaný oqýlaryn ótkizýdi usyndy.
QR Prezıdenti Arhıviniń bas sarapshysy Álııa S.úleımenova «Qazaqstan Respýblıkasy Prezıdenti Arhıviniń qorqurýshylary: Bátish Qazyhanova (14 naýryz 1929 j. – 1 naýryz 2016 j.)» tarıhı-qujattyq kórmeniń negizinde jeke qordyń quramyndaǵy qujattarǵa sholý jasady.
Álııa Súleımenova B.Qazyhanovanyń jaýapkershiligi mol adam bolǵanyna erekshe toqtaldy. «1973 jyly qaıtys bolǵan joldasy Toqtaǵalı Jangeldın týraly qujattardyń barlyǵyn muqııat jınap, jeke muraǵatyn jasaqtaǵan eńbegi bir tóbe. Otyz jyl boıy qoljazba kitaptary men ǵylymı eńbekterin, maqalalaryn kóziniń qarashyǵynaı saqtap, 2000 jyly QR Prezıdenti Arhıvine ótkizdi. Búginde bul jeke tektik qor Bátish Rahymhanqyzynyń qujattarymen de tolyqtyrylyp, osy qujattar negizinde Prezıdent Arhıvi men QazUÝ, Qurmanǵazy atyndaǵy Ulttyq konservatorııasy birlese otyryp, «О́negeli ómir» serııasymen «Bátish Qazyhanova» atty jınaqty jaryqqa shyǵaryp otyr» dedi Álııa Súleımenova.
Jınalys moderatory fılosofııa jáne saıasattaný fakýltetiniń dekany, fılosofııa ǵylymdarynyń doktory Á. Masalımova B. Qazyhanovanyń Qazaqstandaǵy fılosofııa ǵylymyna qosqan úlesin, qoǵamdyq-saıası qyzmeti jaıynda baıandaı kele, ony zamanyna laıyq tulǵa, estetıka salasynyń ádistemesine jańa baǵyt bergen ǵalym-ustaz retinde baǵalady.
Aıgúl AHANBAIQYZY,
«Egemen Qazaqstan»
ALMATY