Prezıdenttiń ókilettigin toqtatý týraly sheshimi Qazaqstan halqyna úlken oı salyp, osy otyz jylda júrip ótken jolymyzǵa bir burylyp qaraǵandaı kúı keshkenimiz anyq. Qazaqstan dara memleket retinde Táýelsizdigin jarııalap, jeke shańyraq bolýdy uıǵarǵan sátinde bolashaq baǵdarymyzdy anyqtap, elimizdi álemdik keńistik aldynda eńsesi bıik el retinde bastap júrý ońaıǵa soqpaǵany belgili. Prezıdent Nursultan Nazarbaevtyń osynaý daǵdarysty jyldardaǵy irgeli isterdi elim, halqymmen birge atqardym deýiniń ózinde úlken kóregendilik jatqany belgili. Osy otyz jyl ishinde el irgesin shaıqaltpaı, shekaramyzdy shegendep, tórtkúl dúnıemen terezesin teń ustaýǵa tyrysqan bilikti qaıratkerlik saıasaty búgingi kúnniń jemisi. Táýelsiz Qazaqstan halqy syndarly joldardan súrinbeı ótip, bıik-bıik belesterdi baǵyndyrdy. Álem bıiginen kórindi. Ulttyq tarıhymyzdy tanýdaǵy, mádenıetimizdi jańǵyrtýda, memlekettik tildi qalyptastyryp, damytýǵa sińirgen eńbeginiń aıryqsha ekendigin atap ótýge tıispiz. Búginde tarıhı tamyry tereńge bastaıtyn Qazaq eli mereıi ústem, darqan el retinde damýdyń dańǵyl jolyna tústi.
Men Nursultan Ábishulyn Prezıdent bolǵan alǵashqy kúnnen bastap bilemin. Osy jyldarda halqyna barynsha qajyr-qaıratymen, ultyna degen zor qurmet, súıispenshiligimen qyzmet etti. Búginde elimizdiń jetken jetistikteri az emes. Salıqaly sheshim qabyldap, Qazaqstannyń keleshegin búgingi jas urpaqqa senip tapsyrǵan Elbasy áli de elimizdiń aldaǵy asar asýlarynda elimen birge bolatynyna senemiz.
О́mirzaq AITBAIULY,
«Qazaq tili» halyqaralyq qoǵamynyń prezıdenti, akademık