Shyǵarmashylyq baǵyttaǵy joǵary oqý oryndary jáne basqa da ýnıversıtetterdiń mýzykalyq fakýltetteriniń stýdentteri jeti baǵyttaǵy mamandyq boıynsha, atap aıtqanda: «Dástúrli mýzyka óneri», «Aspaptyq oryndaýshylyq», «Art-menedjment», «Mýzykalyq bilim berý», «Dırıjerleý», «Kompozısııa», «Vokaldyq óner» saıysqa túsedi.
Konservatorııanyń úlken konserttik zalynda olımpıadanyń saltanatty túrde ashylýy ótti. Saltanatty jıyndy Konservatorııanyń rektory, Qazaqstannyń eńbek sińirgen qaıratkeri Arman Júdebaev ashyp berdi. Rektor sózinde: «Bulaq kórseń – kózin ash» degen sóz bar halqymyzda. Mýzykalyq joǵary oqý oryndarynyń talapkerleri jyl saıyn bul básekeni taǵatsyzdana kútedi jáne ózderi de kásibı daıyndyqpen keledi. Táýelsiz elimizdiń bolashaǵy – jastardy qoldaý maqsatynda uıymdastyrylyp otyrǵan shara bolashaq mamandardyń kásibı múmkindikterin damytý, bilim alýshynyń oqý-tanymdyq belsendiligin yntalandyrý, daryndy bilim alýshylardy irikteý jáne olarǵa shyǵarmashylyq serpin berýdi kózdeıdi. Osyndaı máni joǵary sharany uıymdastyrýǵa zor qoldaý kórsetip otyrǵan, Konservatorııamen tyǵyz yntymaqtastyqta birneshe birlesken is-sharalardy atqaryp júrgen Qazaqstan Respýblıkasy Tuńǵysh Prezıdenti – Elbasy qoryna alǵys bildiremin!» – dep atap ótti. Sharany uıymdastyrýshylardyń biri Qazaqstan Respýblıkasy Tuńǵysh Prezıdenti – Elbasy qorynyń Almatydaǵy ókildiginiń dırektory Sergeı Tohtarov ta sóz alyp, shyǵarmashyl jastardy qoldaý Elbasy qory jumysynyń júıeli túrde júrgizilip otyrǵan basty baǵyttarynyń biri ekenin atap ótti. «Bıylǵy olımpıadanyń Tuńǵysh Prezıdentimiz N.Á.Nazarbaevtyń bastamasymen jarııalanǵan «Jastar jyly» aıasynda ótýi beker emes. Halqymyz «Aqyl jastan, asyl tastan» - demeýshi me edi. Jastardyń bilimi men tapqyrlyǵy jáne jigeri kez-kelgen ulttyń negizgi alǵa qozǵaýshy kúshi ekeni aqıqat. Bul doda – bilimińdi jetildirip, tájirıbeńdi arttyrýdyń taǵy bir múmkindigi bolyp tur. Daryndy tulǵalardyń legin osyndaı saıystar tolyqtyryp otyratynyna kúmánim joq», – dep sóz túıindedi ol.
Ashylý saltanaty Qurmanǵazy atyndaǵy Qazaq ulttyq konservatorııasynyń daryndy stýdentteriniń konserttik baǵdarlamasymen jalǵasty. Olardyń ishinde konservatorııanyń aralas hory, úrmeli aspaptar orkestri, 1 kýrs stýdentterinen quralǵan «Grand Classic» trıosy, halyqaralyq baıqaýlardyń laýreaty Aıdos Baıbosynov jáne taǵy basqa ónerpazdar óner kórsetip ashylý saltanatynyń sánin keltirdi.
Joǵary oqý oryndarynyń stýdentteri úlken dodada 12 mamandyqqa qarasty 16 nomınasııa boıynsha saıysqa tússe, mýzykalyq kolledjder men mamandandyrylǵan mektepterdiń tálimgerleri kishi olımpıadada 9 mamandyq ishindegi 13 nomınasııa boıynsha bilimderin sarapqa salmaq. Respýblıkamyzdyń Aqtaý, Atyraý, Aqtóbe, Kókshetaý, Qyzylorda, Nur-Sultan, Shymkent, Semeı, О́skemen jáne basqa da qalalarynan kelgen ótinish hattardyń jalpy sany 350-den asyp otyr.
Aıta keteıik, XI respýblıkalyq stýdenttik pándik olımpıada sáýir aıynyń 18-ne deıin jalǵasady.
ALMATY