Shákárim Qudaıberdiuly – aqyn, jazýshy, fılosof, tarıhshy, sazger. Abaıdyń inisi ári ol negizin salǵan realıstik ádebıet dástúrlerin alǵa aparýshy izbasary. Onyń qalamynan týǵan syrshyl da tereń oıly óleńderi, «Qalqaman-Mamyr», «Eńlik-Kebek», «Nartaılaq-Aısulý» sııaqty oqıǵaly dastandar, «Ádil-Marııa» romany men basqa da prozalyq týyndylary men aýdarmalary, sazdy áýenderi kóńil terbegen keshti qazaqtyń dástúrli jáne halyq ánderin keńinen nasıhattap júrgen daryndy ánshi Erlan Rysqalı júrgizdi. Bul kúngi áýezdi ánder keshi Talǵat Ábýǵazynyń oryndaýyndaǵy Shákárimniń «23 jasymda» ánimen ashyldy. Halyqaralyq jáne respýblıkalyq baıqaýlardyń laýreaty Aınur Jumaqadyr «Tynyshtyq joq, tynym joq», Nurjan Janpeıisov «Eń qyzyq jastyq», Ardaq Isataeva «Bul án burynǵy ánnen ózgerek», sonymen qatar kúıshi Murat Ábýǵazy Shákárimniń kúıi «Maı túni», ánshi Erkin Shúkiman «Suraǵan janǵa sálem aıt», «Qorqyt. Qoja. Hafız» ánderin tamyljyta oryndady. Keshtiń túıini retinde Shákárimniń «Anadan alǵash týǵanym» ánin áýelete oryndaǵan Erlan Rysqalı konserttik bólimdi aıaqtaǵan tusta mýzeıge saltanatty jaǵdaıda Shákárim qajynyń tól dombyrasy tabystaldy. Endi Yqylas mýzeıiniń tórinde Shákárimniń bebeýletken qasıetti dombyrasy turatyn bolady.
Shákárim qajynyń dombyrasy uzaq jyldar boıy qazaq rýhanııatynyń janashyry mesenat Medǵat Quljanovtyń qolynda saqtalyp keldi. Bul asyl jádiger Medǵat Quljanovtyń qolyna ákesinen qalǵan dúnıelerdiń qatarynda bolǵan eken. Jaryqtyq, Shákárimniń bebeýletken dombyrasy..
Qaıran da qaıran jyldar-aı dersiz...
Saparbaı PARMANQUL, «Egemen Qazaqstan» ALMATY