– Keshe ǵana men Reseı Federasııasyna saparmen baryp keldim. Sapar tabysty boldy dep baǵalaımyn. Reseı Federasııasynyń Prezıdenti Vladımır Pýtınmen mańyzdy kelissózder ótkizildi. Sonyń ishinde Siz jetekshilik etetin sala jóninde de áńgimelestik. Qazir tıisti jobalar eki taraptyń da qaraýynda, – dedi Qasym-Jomart Toqaev.
«Roskosmos» memlekettik korporasııasynyń basshysy Qazaqstan Prezıdentine «Progress-MS11» júk kemesiniń «Baıqońyr» ǵarysh aılaǵynan Halyqaralyq ǵarysh stansasyna sátti ushyrylǵanyn málimdedi.
– Biz keshe álemdik rekord ornattyq. Buǵan deıin kólik kemesi nemese ekıpaj Halyqaralyq ǵarysh stansasyna kóp aınalmaly syzba boıynsha eki táýlik ishinde jetetin. Keshe ǵarysh kemesi Jerdi eki ret aınaldy. Onyń stansaǵa jaqyndaýy jáne túıisýi 3 saǵat 21 mınýt ishinde júzege asty. Máskeýden Baıqońyrǵa deıin úsh saǵattaı ushamyz, endi Baıqońyrdan Halyqaralyq ǵarysh stansasyna da shamamen sonsha ýaqytta jetýge bolady. Qazir aldymyzda odan da qysqa syzba jasaý mindeti tur, – dedi Dmıtrıı Rogozın.
Kezdesýde taraptar ǵarysh salasyndaǵy yntymaqtastyqtyń perspektıvalaryn, sondaı-aq Qazaqstan men Reseıdiń birlesken «Báıterek» ǵarysh jobasynyń iske asyrylý barysyn talqylady.