«Bul biz kútken jaǵdaı edi. Endi 9 maýsymda barlyq kúshti jumyldyryp, halyq bolyp jańa Prezıdentti tańdaýǵa tıispiz. Búkilhalyqtyq zańdy saılaý ótkizýdiń, zańdy Prezıdent saılap alýdyń dál osy jerde tarıhı máni bar», dep atap ótti Rahman Alshanov.
Rahman Alshanov sóz arasynda osyndaı saıası naýqan kezinde barlyq aımaq Almaty, Nur-Sultan tárizdi iri qalalardaǵy kózqarasqa qarap kóshin túzeıtinin aıtty. «Biz, qoǵamdyq keńestiń minberinen spıkerlerdiń pikirin halyqqa jetkizýge múmkindik berýge daıynbyz», dep sóz kezegin dıplomat, qoǵam qaıratkeri Ikram Adyrbekovke berdi.
Ikram Adyrbekov eń aldymen 2019 jyldyń 19 naýryzynan bergi eldegi qoǵamdyq saıası ómirdiń barometrindegi ózgeristerge toqtalyp ótti. Dıplomattyń paıymdaýynsha, «elde aldaǵy ómir qalaı bolady?» degen alań kóńil bar. Osyndaı kúrdeli kezeńde bıliktiń aýysýyn zańdastyryp alý kerek.«Qazir halyqaralyq quqyqty aınadaı móldir dep eshkim aıta almaıdy. Halyqaralyq quqyq buzyldy. Alpaýyt elder halyqaralyq talaptardy belden basyp, ústemdigin ornatýǵa tyrysyp jatyr. Álemdik ekonomıka syr berdi. AQSh ekonomıkasy 2018 jyldy 6 paıyzdyq ósimmen aıaqtady. Eger ekonomıka 7 paıyzdan túsip ketse, memleket bıýdjetti únemdeýge tyrysady. Únemdeý jumys oryndaryn, áleýmettik tólemderdi qysqartý degen sóz.
«Bul – 28 jyldan bergi eń tómengi kórsetkish. Qytaıdyń da alys-jaqyn elderge degen ınvestısııasy keıinge shegerilip jatyr. Bizde osyndaı kezde bılik aýysty. Dál qazir turaqtylyqtyń jáne senimniń mańyzdy ekenin biz bilemiz», dep atap ótti Ikram Adyrbekov.
Odan ári spıker qazirgi Prezıdent Qasym-Jomart Toqaevty shırek ǵasyrdan beri biletinin aıtyp ótti.
Al kezekti spıker Sergeı Ponomarev qazaqstandyqtar úshin bul jolǵy tańdaýdyń salmaǵy aýyr ári mańyzdy ekenin aıtty.
Sonymen demokratııalyq prınsıpterge negizdelgen búkilhalyqtyq saılaýdy belsendilikpen ótkizýdi maqsat etken saıası partııalar men qoǵamdyq birlestikter saılaýaldy daıyndyqtaryn bastap ta ketti. Ústimizdegi jylǵy 9 maýsym kúni saılaýshylar eń senimdi, eń bedeldi degen úmitkerge daýys berip, óz tańdaýlaryn aıqyndaıtyn bolady. ALMATY