AQSh-tyń Sanraız qalasynda ótip jatqan ITF týrnırinde qazaqstandyq tennısshi Dmıtrıı Popko fınalǵa shyqty.
Alǵashqy eki aınalymda AQSh-tyń qos oıynshysy Krıstıan Elshon men Stefan Kozlovty qapy qaldyrǵan jerlesimiz shırek fınalda taǵy amerıkalyq tennısshi Harrıson Adamspen sheberlik baıqasty.
22 jastaǵy Adams álemdik reıtıngte 444 orynda tur. Dmıtrıı Popko ATR tiziminde 623 satyǵa jaıǵasqan. Soǵan qaramastan jeńiske jetý úshin otandasymyz bul básekede baryn salyp, kózdegen maqsatyna qol jetkizdi. Úsh settik saıys 6:4, 4:6, 6:3 esebimen aıaqtaldy.
Jartylaı fınalda taǵy da jergilikti tennısshimen kezdesti. ATR tiziminde 470 orynda turǵan 25 jastaǵy Aleksandr Rıchardty utý oǵan esh qıyndyq týǵyzǵan joq. Dmıtrıı 6:3, 6:2 esebimen jeńiske jetti. Fınalda otandasymyz AQSh-tyń oıynshysy Sebastıan Kordpen kúsh synasady.