Uzaq jyldar prokýratýra salasynda jemisti qyzmet istegen kórnekti zańger Ǵalym Bájimuly Elemesov elimizdiń quqyq qorǵaý, zań salasyn nyǵaıtý isine súbeli úles qosqan tulǵalardyń biri deýge bolady. Ásirese respýblıkanyń quqyq qorǵaý organdary jumysyn jetildirýge, zańdylyqty nyǵaıtýǵa zor eńbek sińirdi. О́ziniń sheber uıymdastyrýshy ekenin de kórsete bildi.
Ǵ.Elemesov otyz jyldan astam ómirinde bilimin quqyq qorǵaý organdaryna, sonyń ishinde 15 jyldan astamyn Kókshetaý oblysyna arnady. Ol oblystyq prokýratýranyń bólim prokýrorynan KSRO Joǵarǵy Sotynyń múshesi, Qazaq KSR Joǵarǵy Sotynyń tóraǵasy, Qazaq KSR Bas Prokýroryna deıin kásibı mansaptyń barlyq satysynan abyroımen ótti.
О́ziniń qaǵıdattylyǵymen, joǵary borysh sezimimen jáne jaýapkershilikpen, eńbekqorlyǵymen jáne kásibıligimen Ǵ.B.Elemesov qyzmettegi áriptesteriniń, respýblıka azamattarynyń arasynda shyn qurmet pen bedelge ıe boldy.
Onyń basshylyq etýimen respýblıkanyń prokýratýra organdary aldynda turǵan mindetterdi tabandy jáne qaǵıdatty sheship, prokýrorlyq qadaǵalaýdy odan ári jetildirý, zańdylyq pen azamattardyń quqyqtaryn qorǵaýdy qamtamasyz etý boıynsha aýqymdy jáne tıimdi jumys atqardy.
Ǵ.Elemesovtiń atyna jazylǵan alǵys hattar buǵan kýá. Olarda Ǵ.Elemesov respýblıka prokýratýrasyna basshylyq etken kezeńde quqyq qorǵaý organdarynyń ózara túsinýshiliktiń jáne iskerlik baılanystyń qurylǵany aıtyldy.
Ǵalym Bájimulymen birge jumys jasaǵan azamattar, er júrek, qaıyrymdy, eńbekqor, adamgershiligi zor erekshe azamat retinde biletinderin aıtyp, esterine alady.
Ǵ.Elemesov prokýratýradaǵy qarbalas jumysty da isteı júrip, ǵylymı eńbekpen de jan-jaqty aınalysty. Zań ǵylymyna zor úles qosyp, osy baǵytta kóptegen kókeıkesti maqalalar jarııalady. Quqyq taqyrybyna eki monografııa jazyp, jaryqqa shyǵardy. 1974 jyly Máskeýde krımınologııa jáne qylmystyq quqyq mamandyǵy boıynsha kandıdattyq dıssertasııa qorǵady.
Ǵ.Elemesov 1-synypty memlekettik ádilet keńesshisi synyptyq sheniniń, «Prokýratýranyń qurmetti qyzmetkeri» tós belgisiniń jáne «Qazaq KRS-niń eńbek sińirgen zańgeri» ataǵynyń ıegeri.
Sonymen qatar, «Halyqtar dostyǵy» ordenimen jáne basqa da kóptegen medaldarmen marapattalǵan.
Zań ǵylymdarynyń kandıdaty, ǵalym Ǵ.B.Elemesov Qazaq KSR Joǵarǵy Keńesiniń H-HI shaqyrylym depýtaty, Qazaqstan Kompartııasy Ortalyq komıtetiniń múshesi bolyp saılanǵan.
Kókshetaý qalasynyń bir kóshesi Ǵ.Elemesovtiń qurmetine atalǵan, oblys prokýratýrasynda onyń mýzeıi jumys isteıdi.
Ǵalym Elemesov jubaıy ekeýi bir ul, úsh qyzdy tárbıelep ósirdi.
«Jaqsynyń aty óshpeıdi» deıdi dana halqymyz. Aty ańyzǵa aınalǵan, ardaqty aǵamyz Ǵ.B.Elemesovtiń esimi árqashan aıtylyp, ómir joly bizge, urpaqtaryna, prokýratýra organdarynyń jas mamandaryna úlgi-ónege bolyp qala bermek.
Tımýr Táshimbaev,
Aqmola oblysynyń prokýrory