Onyń aıtýynsha, AО́K-ti sıfrlandyrý sharalarynyń aıasynda elimizde 20-dan astam sıfrlandyrylǵan ferma, 4 myńnan astam ozyq damyǵan ferma paıda bolady. Aýyl sharýashylyǵy mınıstrligi sıfrly ferma, damyǵan ferma jáne bazalyq ferma degen úsh túrli deńgeıdi qarastyryp otyr. Osy úsh deńgeıdegi fermalardyń árqaısysyna tán artyqshylyqtary bolady. Oblys ákimdikterimen birlesip júrgizilgen saraptama nátıjesi boıynsha, qazirgi tańda Qazaqstanda 114 damyǵan ferma men 10 sıfrly ferma bar.
– Bul – jaqsy bastama. Degenmen, ákimdikter sharýashylyqtardyń sıfrly damýyna memlekettik sharalar arqyly odan ári qoldaý kórsetýge tıis, – dedi K.Abdýllaev.
Osy jıynda aıtylǵandaı, sýarmaly egin alqaptaryn ulǵaıtýǵa da mınıstrlik tarapynan erekshe mańyz berilip otyr. Búgingi tańda respýblıka boıynsha sýarmaly alqaptardyń jalpy aýmaǵy – 1,4 mıllıon gektar, ıaǵnı barlyq egin alqabynyń 7 paıyzy shamasynda. Aldaǵy ýaqytta ony 3,5 mıllıon gektarǵa jetkizý kerek. K.Abdýllaevtyń aıtýynsha, qazaqstandyq fermerlerdiń osy sýarmaly jerlerden alatyn óniminiń kólemi sheteldik fermerlerdiń óniminen 2,4 ese az kórinedi. Degenmen, tıisti ınjenerlik jumystar júrgizilip, zamanaýı tehnologııalar engizilgennen keıin otandyq fermerler de Izraıldegi sharýalar sııaqty mol ónim alatyn bolady.