Sapar barysynda partııa Tóraǵasy Nursultan Nazarbaevtyń «Qutty meken» partııalyq jobasyn júzege asyrý maqsatynda «Nurly jol», «Nurly jer» turǵyn úı qurylysy memlekettik baǵdarlamalary aıasynda salynyp jatqan kópqabatty turǵyn úıdiń qurylysymen tanysty.
Jambyl oblystyq qurylys basqarmasynyń basshysy Jaıyqbaı Shaldarov №15 móltek aýdanyndaǵy 80 páterli turǵyn úı qurylysy 2018 jyly qarasha aıynda bastalǵanyn, bas merdiger – «Agromamandandyrylǵan qurylys» jaýapkershiligi shekteýli seriktestigi ekenin aıtyp ótti. Sonymen qatar, 5 qabatty kóppáterli turǵyn úı aǵymdaǵy jyly shilde aıynda paıdalanýǵa beriledi dep josparlanǵanyn da jetkizdi.
«Nur Otan» partııasy Jambyl oblystyq fılıaly Partııalyq baqylaý komıssııasynyń tóraǵasy Abaı Nurjanov, Taraz qalasy ákiminiń mindetin atqarýshy Beısenbek Janbosynov ótken jyly «Nurly jer» memlekettik baǵdarlamasyn iske asyrý maqsatynda respýblıkalyq bıýdjetten jalǵa beriletin turǵyn úı qurylysyna 1 mıllıard 406 mıllıon 511 myń teńge, oblystyq bıýdjetten 164 mıllıon 245 myń teńge qarajat bólinip, «Araı» turǵyn alqabynda jáne «Báıterek» móltek aýdanynda jalpy turǵyn úı alańy 14 myń sharshy metrdi quraıtyn 3 turǵyn úı, ıaǵnı 240 páter paıdalanýǵa berilgenin atap ótti. Nesıege beriletin turǵyn úı qurylysyna 4 mıllıard teńgeden asa qarajat bólinip, №15 móltekaýdanda 80 páterli 10 turǵyn úıdiń qurylys jumystary bastalyp, 9 úı paıdalanýǵa tapsyrylǵan. Jalpy ótken jyly 12 kópqabatty turǵyn úı, ıaǵnı 960 páter paıdalanýǵa berilgen. Al, №15 móltekaýdandaǵy 80 páterli 9 turǵyn úıdiń qurylysy byltyrǵy jyly qarasha aıynda bastalyp, bıylǵy tamyz aıynda aıaqtalady dep josparlanyp otyr. Bul qurylysqa jalpy quny 5 mıllıard tengeden asa qarjy qarastyrylǵan bolatyn.
Jambyl oblysy