Is-shara kitap pen avtorlarǵa qurmet kórsetip, kitap oqýdy nasıhattaýdy maqsat etedi. Bul mereke jańa tehnologııalar ǵasyrynda kitaptyń burynǵysha kóshbasshylyq orynda turatynyn, al kitap oqý janǵa lázzat syılaıtyndyǵyn eske salýǵa baǵyttalǵan.
Osyǵan oraı, 23 sáýirde Almatydaǵy Qazaqstan Respýblıkasynyń Ulttyq kitaphanasynda dástúrli túrde Dúnıejúzilik kitap kúni atalyp ótti.
«KITAP SHOY´- 2019» -merekesiniń mazmundy baǵdarlamasynda kitap kórmeleri, ádebı vıktorınalar jáne teatrlandyrylǵan kórinister, tanymal jazýshylarmen kezdesýler, kitaptardyń tusaýkeseri jáne konsertter, eń úzdik oqyrmandar men avtorlarǵa qurmet kórsetý sııaqty qyzyqty sharalar qamtyldy. Bul, shyn máninde, kóptildi kitap oqý merekesi jáne ýaqytty paıdaly ótkizýdiń tamasha múmkindigi boldy.
Kitap oqýǵa, rýhanı qazynany qurmetteýge shaqyrǵan sharany Almaty qalasyndaǵy IýNESKO-nyń Klasterlik bıýrosy, Qazaqstan Respýblıkasyndaǵy Reseı yntymaqtastyq ókildigi, Almaty qalasyndaǵy Qytaı Halyq Respýblıkasynyń Bas konsýldyǵy, Almaty qalasyndaǵy Gete-Instıtýty, Almaty qalasynyń Mádenıet basqarmasy, Almaty qalasy Ortalyqtandyrylǵan kitaphanalar júıesi, «EDU Stream» Bilim berý kompanııasy, «Ádebıet álemi» Jastardy qoldaý ortalyǵy, «Darııa» Damý ortalyǵy qoldaı otyryp, mereke seriktesteri retinde jan-jaqty baǵdarlamamen baıyta tústi. Mysaly, Qazaqstan Respýblıkasyndaǵy Reseı yntymaqtastyq ókildigi «Keńes aqyndary – balalarǵa bazarlyq» ádebı-teatrlandyrylǵan kompozısııa usynsa, QHR-diń Almaty qalasyndaǵy Bas konsýldyǵy «Sıan Sınhaı: «Qazaqstandaǵy ómir» kitabynyń avtory Qalamqas Arıslanovamen kezdesý ótkizip, Sıan Sınhaıdy eske alý fotokórmesin uıymdastyrdy. Kitaphana qonaqtaryna «Qytaı ertegileri» atty kitaptaryn syıǵa tartty. Qazaqstan Gete-Instıtýty «Interaktıvtik oqý: Bremen mýzykanttary», balalar ádebıetiniń kórmesimen jáne «Actionbound» mobıldik oıynymen qýantty. Almaty qalasy Ortalyqtandyrylǵan kitaphana júıesi bolsa, balalar jazýshysy, "Zolotoe pero Rýsı" ulttyq ádebı syılyǵynyń, "Altyn qalam-2011" qazaqstandyq ádebı syılyǵynyń laýreaty, balalarǵa arnalǵan "Jeltaıa gýsenısa" 1 Búkilreseılik jazýshylar baıqaýynyń jeńimpazy Elena Klepıkova jáne balalar aqyny, aýdarmashy, respýblıkalyq «Móldir bulaq» jýrnalynyń redaktory Saıat Qamshygermen kezdesý ótkizip, kitaptyń adam ómirindegi mańyzy týraly áńgime órbitti. «Ádebıet álemi» Almaty qalasy jastar saıasatyn damytý ortalyǵy kitapsúıer kópshilikti «Otan, saǵan jyr órimin usynam» atty aqyn Murathan Shoqannyń jeke shyǵarmashylyq keshimen qaýyshtyrdy. Sondaı-aq tanymal kınorejısser Ermek Tursynovpen jáne «Shal» fılminiń akterlerimen shyǵarmashylyq kezdesý ótti.
ALMATY