El birligi men etnosaralyq kelisimdi nyǵaıtyp, mádenıetaralyq únqatysýdyń qazaqstandyq úlgisin kórsetken shara etnomádenı birlestikterdiń mýzykasyn, dástúrin, tili men mádenıetin jańǵyrtý, saqtaý jáne damytý maqsatynda uıymdastyryldy.
Merekelik sharaǵa Uly Otan soǵysynyń ardagerleri, oblystyq Qazaqstan halqy Assambleıasynyń etnomádenı birlestikteriniń ókilderi, jastar qanaty músheleri, «Jańǵyrý joly» jobasynyń belsendileri jáne qala turǵyndary qatysty.
Festıval qonaqtary «Bir shańyraq astynda» etnoaýylynyń kórmesin tamashalap, etnostardyń ulttyq qolóneri, qoldanbaly turmystyq zattarymen jáne ár ulttyń ózine tán taǵamdarymen tanys boldy.
Kórmeden soń festıval jumysy «Biz bir otbasymyz» konkýrsyna ulasty. Konsert Qaraǵandy oblysy ákimi apparaty «Qoǵamdyq kelisim» KMM dırektory Erlan Qusaıynnyń quttyqtaý sózimen bastaldy.
Saıys sharty boıynsha ár etnomádenı birlestik týǵan tilinde jáne memlekettik tilde óz ónerlerin ortaǵa saldy. Konkýrsqa oblystyq etnomádenı birlestikterdiń shyǵarmashylyq ujymdary qatysyp, ulttyq áýenderin áýeletip, myń burala bı bıledi. Sonymen qatar, olar dombyra da tartyp, qazaq tilinde án shyrqady.
Shara sońynda etnomádenı birlestikterdiń ókilderi maqtaý qaǵazdarymen marapattaldy.