Festıval 2019 jylǵy mamyrdyń 24 men maýsymnyń 1 aralyǵynda ótedi. Zlin Film Festival balalar fılmderine arnalǵan álemdegi eń aýqymdy kınofestıval. Festıval aıasyndaǵy kórsetilimder Zlın qalasynan bólek Chehııanyń basqa da qalalarynda ótedi. Jyl saıyn festıval aıasynda 50-den astam elden kelgen 300-ge jýyq fılm kórsetiledi. 2010 jyldan bastap festıvaldi tamashalaýǵa 95 myńnan astam eresek pen kishkentaı balalar kelgen.
«Muzbalaq» anımasııalyq fılmi qazaqtyń ǵasyrlar boıy qalyptasqan saıatshylyq mádenıeti jáne adam men búrkit arasyndaǵy dostyq týraly baıandaıdy.
«Álem kıno keńistigine qazaq anımasııasynyń jetistikteri týraly jar salatyn kez keldi. Biz sol úshin de eńbek etemiz. Bizdiń árbir jasaǵan týyndymyz aýqymdy kınofestıvalge qatysýy tıis. «Muzbalaq» bıik belesterdi baǵyndyrýyna tilektespin», dedi «Qazaqfılm» AQ anımasııalyq birlestiginiń jetekshisi Adaı Ábildınov.
Esterińizge sala keteıik, «Muzbalaq» byltyr QR Kınematografısteri odaǵynyń «Qulager» júldesinde, «Úzdik anımasııalyq fılm» nomınasııasy boıynsha jeńimpaz atanǵan. Sonymen qatar, XVII «Alaý rýhy» Halyqaralyq kınematografııalyq debıýtter kınofestıvaliniń balalar jáne jasóspirimder fılmderi konkýrstyq baǵdarlamasyna qatysqan (Hanty-Mansıısk, RF).