Keshe Jambyl oblystyq ishki saıasat basqarmasynyń uıymdastyrýymen Taraz qalasyndaǵy «Qoǵamdyq kelisim» mekemesinde «Táýelsiz memleket qurýdaǵy jáne onyń damýyndaǵy Elbasynyń róli» atty dóńgelek ústel otyrysy ótti. Áýeli jıyn qatysýshylaryna Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev týraly derekti fılm kórsetildi. Jıyndy ashyp, júrgizip otyrǵan oblystyq ishki saıasat basqarmasy basshysynyń orynbasary Berik Begalıev Nursultan Ábishulynyń memleketti qalyptastyrýdaǵy tarıhı róli jáne beıbitshilik pen kelisimdi nyǵaıtý jónindegi eńbegin aıtyp ótti. Al, «Jańarý» Sybaılas jemqorlyqqa qarsy jalpyulttyq qozǵalysy» respýblıkalyq qoǵamdyq birlestigi Jambyl oblystyq fılıalynyń tóraǵasy Qasymhan Tólendıev Elbasynyń elimizdiń syrtqy saıası baǵytyn aıqyndaýǵa, sonymen qatar táýelsiz elimizdiń damýyna qosqan úlesine toqtaldy. О́z sózinde «Rýhanııat» taldaý, aqparat jáne monıtorıng ortalyǵy» qoǵamdyq birlestiginiń tóraıymy Úrtaı Sapaqova Nursultan Ábishulynyń memlekettiń damýy úshin júrgizgen salıqaly saıasaty jóninde áńgime qozǵady.
Sonymen qatar, «Jambyl oblysynyń Azamattyq Alıansy qaýymdastyǵy» qoǵamdyq birlestiginiń tóraǵasy Zaıtjan Iýldashev, «Jastar-zertteý» jastar qoǵamdyq birlestiginiń tóraıymy Parıda Mamedova, «Asyl-Arman» ulttyq dástúr men ónerdi qoldaý» qoǵamdyq birlestiginiń tóraǵasy Rınat Nuraqbaev jáne «Rýhanı jańǵyrý» jobalyq ofısi» mekemesiniń dırektory Serikbol Berikqoja táýelsiz memleket qurýdaǵy Elbasy róliniń erekshe ekenin atap ótti. Al, ishki ister salasynyń ardageri Jánibek Maıhanov, ardager jýrnalıst Saparǵalı Álibaı Elbasy ómirinen erekshe estelikter aıtsa, jas aqyn Maral Hantóre Nursultan Ábishulyna arnalǵan óleńin oqyp berdi.